Əfqanıstana nəzarəti ələ alan (hələlik Pəncşir vadisi istisna olmaqla) “Taliban” hərəkatı Kabili tutduqdan dərhal sonra qadınların işləməsinə və təhsil almasına “şəriət qaydaları daxilində” icazə veriləcəyini açıqlasa da hazırda onlara evdən çölə çıxmağı məsləhət görmür. Çünki “Taliban” döyüşçüləri, hərəkatın sözçüsü Zabihullah Mücahidin bildirdiyi kimi, qadınlarla rəftar barədə xüsusi təlim keçməyiblər və onları küçədə tutub zorlaya bilərlər. “Taliban” nümayəndəsinin bu bəyanatı beynəlxalq mediada geniş rezonansa səbəb olub.
Alp.az xəbər verir ki, Zabihulla Mücahid bu barədə Kabildə keçirdiyi brifinqdə bildirib. “Qadınların evdə qalması lazımdır, ən azından hələlik. Niyə? Çünki döyüşçülərimizdən bəziləri hələlik qadınlara zərər verməmək məsələsində təlim görməyib. Bizə yeni qatılanların yetərli təlim almadıqları üçün qadınlarla pis davranmasından ehtiyat edirik. Allah göstərməsin, döyüşçülərimizin qadınlara zərər verib onları zorlamasından ehtiyat edirik”,-o deyib.
“Taliban” nümayəndəsi bildirib ki, “qadınlarla rəftar barədə yeni prosedur hazırlanana qədər” onlar evdə qalmalıdır. Və maaşları evlərində ödəniləcək. “Hələlik vəziyyət normallaşana qədər evlərində qalmalarını istəyirik. Hazırda hərbi vəziyyət hökm sürür”,-Mücahid bildirib.
Qeyd edək ki, “Taliban” 1996-2001-ci illərdə Əfqanıstana qismən nəzarət edəndə qadınların evlərindən çölə çıxması, təhsil alması, işləməsi qadağan edilmişdi. Qadınlar ancaq yanlarında əri, qardaşı və ya yaxın qohumu (kişi cinsindən) olarsa evdən çölə çıxa bilərdi.
İndi “Taliban” ikinci dəfə hakimiyyətə gəldikdən sonra beynəlxalq ictimaiyyətin nəzərində mötədil görünməyə və qadınlara müəyyən hüquqlar veriləcəyinə inandırmağa çalışır. Lakin beynəlxalq insan haqları təşkilatları Əfqanıstanın müxtəlif yerlərində taliblərin qadınlara və keçmiş hakimiyyətin nümayəndələrinə divan tutduqları barədə həyacanlı məlumatlar alırlar.
“Taliban”ın qorxunc əməllər törətdiyi barədə Əfqanıstanın keçmiş daxili işlər naziri Məsud Əndarabi də özünün Twitter səhifəsindən bildirib. O, taliblərin edamlar həyata keçirdiyini, qurbanlar arasında hətta uşaqların da olduğunu yazıb. Və “Taliban” tərəfindən öldürüldüyü iddia edilən insanların, o cümlədən bir azyaşlı uşağın qorxunc fotolarını paylaşıb.
O, bildirib ki, “Taliban” ölkədə qorxu mühiti formalaşdırır, azyaşlı uşaqları və yaşlıları belə öldürməklə insanları ona itaət etməyə məcbur etmək istəyir.virtualaz
