Hazırda İrəvanın əsas siyasi gündəm mövzusu Belarus Prezidenti Aleksandr Lukaşenkonun bir neçə gün əvvəl Ermənistan və ermənilər barədə səsləndirdiyi aşağılayıcı fikirlər və bu ölkənin istəsə də, istəməsə də Rusiya ilə Belarusun yaratdığı “ittifaq dövlətinə” qoşulacağına dair dedikləridir.
Xatırladaq ki, Lukaşenko Kremlin qulluğunda duran telejurnalist Vladimir Solovyova son müsahibəsində Ermənistanın İttifaq Dövlətinə qoşulması perspektivi barədə deyib: “Ermənistanın gedəcək yeri yoxdur. Elə bilirsiniz ki, onlar kiməsə lazımdırlar? Onlar artıq bunu gördülər… Nikol Vovayeviç(Paşinyan-red.) bunu gördü.”
Xəbər verildiyi kimi, Lukaşenkonun bu sözləri iki ölkə arasında diplomatik qalmaqala səbəb olub. Belarus səfiri Ermənistan XİN-ə çağırılıb, həmçinin, XİN sözçüsü rəsmi şəkildə Belarus Prezidentinə etirazını bildirib və s.
Alp.az Ermənistan mətbuatına istinadla xəbər verir ki, bu məsələ Ermənistanın Təhlükəsizlik Şurasının(TŞ) katibi Armen Qriqoryanın fevralın 10-da İrəvanda keçirdiyi brifinqdə də əsas mövzulardan biri olub. Hökumətin iclasından sonra jurnalistlərin qarşısına çıxan Qriqoryan hökumətin adından çıxış edərək deyib ki, Ermənistanın gündəliyində “ittifaq dövlətinə” qoşulmaq məsələsi yoxdur: “Mənim mövqeyim belədir ki, Ermənistan suveren və demokratik dövlətdir və belə də qalmalıdır”.
Ardınca Qriqoryan A.Lukaşenkonun fikirlərinə də münasibət bildirib. O, deyib ki, ARTIQ Belarus Prezidentinə cavab verilib və indidən sonra Lukaşenkonun Ermənistanın ünvanına buna bənzər fikirlərlə çıxış etməyəcəyinə ümidlidirlər: “Biz diplomatik tərzdə cavab veririk və ümid edirik ki, belə situasiya bir daha təkrarlanmayacaq. Əgər insident təkrarlansa, necə cavab verəcəyimiz barədə düşünəcəyik. Bütün addımlar atılıb”.
Brifinqdə maraqlı məqamlar yaşanıb. Belə ki, jurnalistlər nədən hakimiyyətin Belarus Prezidentinə cavab verdiyi halda, “Əliyevin demarşlarını cavabsız qoyduğunu” soruşublar.
Bu sual Qriqoryanı özündən çıxarıb: “Belə bir sual verərkən, Belarus və Azərbaycanla münasibətlərimizi ayırmalısınız, əgər belə bir münasibət varsa. Sizi daha çox kim incidir – sizə yaxın olan adam, yoxsa münasibətlərinizin pis olduğu adam?”
Bununla da Qriqoryan demək istəyib ki, Belarusu Ermənistana yaxın dövlət hesab etdikləri üçün onun prezidentinin dediklərindən inciyiblər və kəskin reaksiya veriblər…
Qriqoryan Rusiyanın Qarabağdakı müvəqqəti hərbi kontingentinin həmin ərazidə qalması müddətinə dair suala cavab verərkən isə rus hərbçilərinin orada “məsələ həliini tapana qədər” saxlanılması istiqamətində addımlar atdıqlarını deyib.
Ermənistan mətbuatında daha çox TŞ katibinin İttifaq Dövləti barədə dedikləri müzakirə olunmaqdadır. Qriqoryanın bu məsələnin Ermənistanın gündəliyində olmadığını söyləməsi bir çoxları tərəfindən Paşinyan hakimiyyətinin Moskvanın istəklərinin əleyhinə getməsi kimi dəyərləndirilir. Belə ki, bu mənzərəyə görə hökumət iqtisadi, siyasi, hərbi və s. strateji məslələr baxımından Moskvadan birbaşa asılı olsa da, Rusiyanın keçmiş SSRİ-nin prototipi kimi yaratmaq niyyətində olduğu “ittifaq dövlətinə” qatılmaqdan boyun qaçırır.
Lakin ötən gün Ermənistanın “Past” qəzeti bu mövzuyla bağlı maraqlı məlumat yayıb. Məlumatda deyilir ki, Lukaşenkonun Ermənistanla bağlı son fikirləri təsadüfi deyil və Rusiya Ermənistanın 2024-cü ilə qədər “ittifaq dövlətinə” daxil olmasına çalışır. Hətta bununla bağlı İrəvana tez-tez öz emisarlarını göndərir. Artıq hakimiyyət dəhlizlərində də bu məsələlərin müzakirə olunduğu qeyd edilir. Qəzet həmçinin bildirir ki, Moskva Ermənistandakı rusiyameylli müxalifətlə, yəni Koçaryan-Sarqsyan cütlüyü ilə də bu istiqamətdə aktiv məsləhətləşmələr aparır.
Məlum olduğu kimi, Paşinyan hakimiyyəti ilk günlərindən özünü Qərb yönümlü kimi göstərməyə çalışır. Moskvanın da İrəvandakı indiki hökumətə bel bağlamadığı şübhəsizdir. Ancaq buna baxmayaraq, Ermənistanda bir çox təhlilçilər Paşinyanın Moskvanın “ittifaq dövlətinə” qoşulmaq tələbinə müsbət yanaşacağını istisna etmirlər.
Çünki nə iqtisadiyyatı nə də ordusu qalan və əhalinin sürətlə tərk etdiyi Ermənistanın bu regionda qismən də olsa müstəqil siyasət yürütməsi, Qərbə istiqamət götürməsi imkansız görünür. Həmçinin, Paşinyan Rusiyanın tələbinə qarşı çıxmayaraq, Qazaxıstana 100 nəfərlik hərbi dəstə göndərməklə Moskvanın cızdığı xətdən kənarda oynamaq qabiliyyətini demək olar ki, itirdiyini ortaya qoydu. Bu baxımdan Armen Qriqoryanın “”ittifaq dövləti” Ermənistanın gündəliyində deyil” fikrinin İrəvanın son və qəti mövqeyi olduğunu söyləmək çətindir…/azpolitika/
