Dünya ölkələri koronavirus pandemiyasının yeni dalğası ilə üz-üzədir və sərt karantin tədbirlərini bərpa edənlərin sayı artır. virtualaz.org xəbər verir ki, belə bir vaxtda Dünya Səhiyyə Təşkilatının rəhbəri Tedros Adhanom Qebreyesus pandemiyanın sonunun hələ görünmədiyini deyib.
Doktor Qebreyesus Berlində dünya səhiyyə Sammitində çıxışı zamanı bildirib ki, pandemiya ancaq “dünyanın istədiyi vaxtda” bitəcək. “Əlimizdə ehtiyac olan bütün alətlər var: təsirli ictimai səhiyyə alətləri və tibbi ləvazimatlar. Amma Dünya bunları düzgün istifadə etmədi. Hər həftə 50 mindən çox insanın öldüyü bir vaxtda pandemiyanın bitəcəyi gün çox uzaqlardadır”,-o deyib.
Bu arada Rusiyada koronavirusa yoluxmalar və ölüm hallarında hər gün rekord qeydə alınır, hakimiyyət isə lokdaun məhdudiyyətlərini yenidən tətbiq etməyə hazırlaşır. Prezident Vladimir Putin oktyabrın 30-dan noyabrın 7-dək “qeyri-iş” həftəsi elan edib. Moskvanın meri Sergey Sobyanin isə oktyabrın 28-dən noyabrın 7-dək lokdaun tədbirlərini yenidən tətbiq edib, bütün mağazalar, barlar və restoranlar qapadılır, yalnız vacib mallar mağazaları işləyəcək.
Rusiya koronavirusdan 228 min 453 ölümlərin sayına görə (ötən həftə sonuna olan məlumat) Avropada birinci, dünyada dördüncü yerdədir. Ölkədə COVID-19-a qarşı ilk vaksinin təsdiqlənməsinə baxmayaraq, 146 milyona yaxın əhalinin cəmi 30 faizə yaxını peyvənd vurdurub. Avropa Birliyinin (AB) oktyabrın 21-də açıqladığı hesabata görə, Rusiyanın qərbdə vaksin tərəddüdü haqda sistematik dezinformasiya kampaniyası əks təsir göstərib. Hesabatda deyilir ki, RT dövlət televiziyası və digər media orqanları vaksinlərin effekti və təhlükəsizliyi haqda rusca daxil olmaqla bir neçə dildə inamsızlıq yaratmağa çalışıblar.
“Dezinformasiya öldürə bilər. Bunu yadda saxlamaq lazımdır. Rusiyada ölüm halları artdığı bir vaxtda Kreml mediası COVID-19 və vaksinlər haqda yalanlar yaymaqdadır”, – AB-nin “Dezinformasiya Xülasəsi” adlı hesabatında deyilir. Kreml isə vaksinlər haqda dezinformasiya aparmadığını bildirir.
Son həftələr Şərqi Avropa ölkələrində də yoluxmalarda kəskin artım yaşanır, hakim orqanlar qadağalar elan edir. Ukrayna hökuməti son 24 saat ərzində COVID-19-dan 614 nəfərin öldüyünü bildirir. Bir gün öncə bu rəqəm 546 idi. İndiyədək bu ölkədə pandemiyaya 2.72 milyon nəfər yoluxub, 63 min nəfər vəfat edib.
Oktyabrın 22-dən yoluxmaların yüksək olduğu yerlərdə məktəblər qapadılıb. Paytaxt Kiyev daxil, bu məktəblərdə iki həftəlik tətil elan olunub.Hökumət paytaxtda ictimai nəqliyyatda vaksin sertifikatı, yaxud neqativ test nəticəsi tələb edir. Peyvənd olunmayanların restoranlara, idman və digər tədbirlərə çıxışı da məhdudlaşdırılıb. Ukraynada 41 milyonluq əhalinin yalnız 6.8 milyon nəfəri tam peyvənd olunub.
Artıq Latviyada bir aylıq lokdaun elan olunub. Ölkədə yoluxmalar ən yüksək həddə çatmışdı. Bolqarıstan və Rumıniyada yoluxmalarda artım xəstəxanaların işini çətinləşdirib. Bolqarıstanda koronavirusdan xəstəxanaya yerləşdirmə halları son bir ayda 30 faiz artıb. Paytaxt xəstəxanalarında vacib olmayan əməliyyatlar təxirə salınır.
Ölkədə hər dörd yetkin yaşlıdan yalnız dördü tam peyvənd olunub, çoxları vaksinlənməyə tərəddüdlə yanaşır. Sofiya və digər şəhərlərdə yüzlərlə insan qapalı məkanlara giriş üçün tələb olunan vaksinasiya sertifikatına qarşı etiraz aksiyalarına çıxıb.
Rumıniyada isə ötən həftə gündəlik yoluxmalar 19 minə yaxınlaşıb. Ölkə üzrə hər üç yetkin yaşlıdan birinə peyvənd vurulub ki, bu da Avropa Birliyində ikinci aşağı göstəricidir.
Ermənistanda da gündəlik yoluxmalar və ölüm halları sürətlə artır, bu ölkənin onsuz da miskin durumda olan ictimai səhiyyə sisteminə təzyiqlər artır. Yaranmış vəziyyəti nəzərə alaraq Ermənistanın Səhiyyə Nazirliyi elm, təhsil və mədəniyyət Nazirliyinə ali məktəblərdə təhsilin distant formasına keçmək təklifi verib.virtualaz.org
