Əfqanıstanın keçmiş vitse-prezidenti, hazırda Pəncşir vadisində “Taliban” əleyhinə Müqavimət Cəbhəsinə rəhbərlik edən Əmrullah Saleh “Taliban”a təslim olmayacağını deyib.
Böyük Britaniyanın “Daily Mail” qəzeti xəbər verir ki, Ə.Saleh Əfqanıstan rəhbərliyinin müharibə nəticəsində əziyyət çəkən ölkənin insanlarını necə tərk etdiyini açıqlayıb. 48 yaşlı Saleh, böhran dövründə ölkəsini tərk edən siyasətçilərin öz torpaqlarına xəyanət etdiyini bildirib: “Avqustun 15-də səhər o vaxtkı müdafiə naziri, daxili işlər naziri Bismillah Xan Məhəmmədi və onların müavinləri ilə əlaqə saxlamağa çalışdım, amma onları tapa bilmədim. Hər iki nazirlikdə ehtiyatları və ya komandoları cəbhə bölgələrinə köçürə bilməyəcəklərini söyləyən çox fədakar məmurlar tapdım. Çətin bir zamanda şəhərin heç bir yerində yerləşdirilə biləcək Əfqanıstan qoşunlarını tapa bilmədim. Sonra Kabil polis rəisi ilə danışdım, çox cəsur bir adamdır, harada olursa olsun, ona yaxşı olmağı arzu edirəm. O mənə hər şeyi izah etdi…”
Polis rəisi Salehdən komandoları yerləşdirmək üçün kömək istəyib. O, polis rəisinə kömək etmək üçün heç bir qoşun toplaya bilmədiyini söyləyib. Prezident sarayı və keçmiş Milli Təhlükəsizlik müşaviri Həmdullah Mohib ilə əlaqə saxlasa da, heç bir faydası olmayıb: “Kəşfiyyat rəhbəri bir gün əvvəl məni ziyarət etmişdi. Ondan “Taliban” Kabilə hücum edərsə, planın nədir deyə soruşduqda cavab verdi ki, onun planı hara getsə mənə qoşulmaqdır”.
Ə.Saleh deyib ki, Əfqanıstan Prezidenti Əşrəf Qani və digər rəsmilər xalqa xəyanət edib: “Onlar xaricdə otellərdə və villalarda qalır. Sonra da ən kasıb Əfqanıstanı üsyana səsləyirlər. Bu çirkin bir şeydir, bu qorxaqlıqdır. Bir üsyan istəyiriksə, üsyana rəhbərlik etmək lazımdır. İndi deyə bilərlər ki, Əfqanıstanda qalsaydılar, şəhid olardılar. Niyə olmasın? Şəhid olmaq üçün liderlərə ehtiyacımız var. Əsir alınacaqlarını deyəcəklər. Niyə olmasın? Məhbus kimi xidmət etmək üçün liderlərə ehtiyacımız var”.
Hökumət tərəfindən heç bir kömək və dəstək gəlmədiyi üçün Saleh, Əhməd Şah Məsudun oğlu Əhməd Məsuda müraciət edib: “Müəllimim mərhum Məsudun oğlu Əhməd Məsuda xəbər göndərdim, onunla qüvvələri birləşdirməyi təklif etdim”.
Saleh Kabildən getməzdən əvvəl evinə gedib həyat yoldaşının və qızlarının şəkillərini məhv edib, kompüterini və bəzi əşyalarını toplayıb, daha sonra baş mühafizəçisi Rəhimdən əlini Qurana basmasını xahiş edib: “Biz Pəncşirə gedirik və öz yolumuzda birlikdə mübarizə aparacağıq. Amma yaralansam, səndən bir xahişim var: Başımdan iki dəfə vur. Mən “Taliban”a təslim olmaq istəmirəm…”
Ə,Saleh deyir ki, şimal keçidini çox çətinliklə keçiblər, iki dəfə “Taliban”ın hücumuna məruz qalsalar da, sağ qalıb.AzPolitika.info
