Ukraynanın müdafiə naziri Aleksey Reznikov xalqa müraciət edib, sakitliyə çağırıb və bildirib ki, ordu müdafiəni saxlayır, Rusiya qoşunlarına müqavimət göstərir. “Düşmən bizim Şərqdəki müəssisələrimizi, habelə digər regionlardakı hərbi idarəetmə mərkəzlərini və aerodromları intensiv atəşə tutur. Hərbçilərimiz əllərindən gələni edirlər ki, sizi müdafiə etsinlər və təcavüzkara ölkənin içərilərinə soxulmağa imkan verməsinlər”,-nazir deyib.
Reznikov əhalini evlərində qalmağa, təhlükəsiz yerlərdə sığınacaqlara yerləşməyə çağırıb.
Ukrayna silahlı qüvvələrinin Ali baş komandanı general Valeri Zalujnıy isə Facebook üzərindən yaydığı bəyanatında bütün bölmələrə düşmənə şiddətli müqavimət göstərmək əmri verildiyini bildirib. “Bu gün, fevralın 24-də saat 05.00-da Rusiya silahlı qüvvələri bizim şərqdəki bölmələrimizi intensiv atəşə tutub, Borispol, Ozernı, Kulbakino, Çuquyev, Kramatorsk, Çernobakeyevkadakı aerodromlarımıza raket zərbələri endirib. Eyni zamanda təcavüzkar dövlət sərhədi boyu və Krımla sərhəddəki yaşayış məntəqələrimizi də raket-artilleriya atəşinə tutur”,-Zalujnıy bildirib.
