Bir ailənin nur çırağı idi. Doğulduğu ailənin tək oğul payı kimi böyük bir məsuliyyəti var idi. Arzusu dənizçi olmaq idi qəhrəmanımızın. Arzusu üçün yola çıxmışdı. Amma nəsibi şəhidlik zirvəsi oldu.
Alp.az xəbər verir ki, bu gün doğum günü olan qəhrəmanımız, şəhid Allahverdi Bəhram oğlu Novruzov 1994-cü ildə mayın 17-də Salyan şəhərində anadan olub. Atası Bəhram kişi ustadır, anası Məlahət xanım evdar qadın. Ailədə bir bacı, bir qardaşdırlar. Sadə və zəhmətkeç bir ailədirlər. Allahverdi ibtidai təhsilini yaşadıqları “Plastik” yaşayış massivində yerləşən 9 illlik (həmin vaxt 9-illik, hazırda 11 illik) məktəbdə başa vurduqdan sonra, orta təhsilini 2011-ci ildə Salyan şəhər 2 saylı orta məktəbdə alıb. Həmin ildə də Dənizçilik Akademiyasına qəbul olunub. O, 2017-2018-ci illərdə cəbhə bölgəsinin təmas xəttində, Xocavənddə hərbi xidmət edib. Hərbi xidmət zamanı kəşfiyyatçı bacarığına yiyələnib. Hərbi xidmətini başa vurduqdan sonra işə düzəlmişdi. “Etalon security” MMC özəl mühafizə agentliyinin ARDNIŞ-in “Nərimanovneft” NQÇİ-dəki xidmət qurumunda mühafizəçi işləyirdi. Özünün səmimiliyi ilə iş yerində təmasda olduğu bütün insanların dərin hörmətini qazanmışdı. Məhz mehribanlığına və mərdliyinə görə Allahverdi Salyan rayonunda yaşıdları arasında ən hörmətli gənclərdən biri idi.
Allahverdi keçən ilin sentyabrında səfərbərlik elan olunarkən, ayın 21-də yenidən könüllü şəkildə orduya qayıdıb. Elə ilk gündən hərbi təlimlərdə iştirak edib. O, müharibə başlayan ilk gündən Fizuli uğrunda gedən döyüşlərin önündə olub. Lakin xain düşmənin atdığı mərmi yaxınlığına düşdüyündən şəhid olub.
44 günlük müharibə zamanı anası ilə bir neçə dəfə telefonla danışıb Allahverdi. Hər dəfə də elə bil vəsiyyət edib.”Ana mən şəhid olsam, ağlama. Bilirəm çətindir. Amma mən haqq yolunda şəhid oluram.”
