Sosial mediada qanuna söykənən bir süjet yayımlanıb. Süjetdə sübut olunur ki, sürücüləri dayanma-durmaya görə cərimələmək üçün küçələrə qoyulan kameralar qanunsuzdur! Mən və minlərlə sürücü bir dəqiqə maşından düşüb geri qayıdanda görürük ki, sms-lə 20 manat cərimə gəlib! Qanuna görə, sürücülərin dayanma-durma qaydasını pozmaları sübut olunduqda şəkillərlə birlikdə sürücünün evinə ya da telefonuna göndərilməlidir. BNA-nın mətbuat katibi isə ağ yalan danışaraq deyir ki, guya BNA- nın əməkdaşları qanuna əməl edirlər. Şəxsən mən ayda 10-15 dəfə 20 manat cərimə ödəyirəm. Hələ mənə qaydanı pozmağım haqqında bir dənə də şəkil göndərilməyib! Başqa sürücülər də bu qanunsuzluğu təsdiqləyə bilərlər. Belə isə Mais Ağayev xalqdan utanmır, yalan danışır?
İdarə təzə yaradılanda mən bu qanunsuzluqları görüb, mətbuatda yazmışdım ki, bu xalqı narazı salan yuva bağlanmalıdır! “525-ci qəzet” və bir sıra mətbuat orqanları kəsərli yazılar dərc etdilər. Əlaqədar təşkilatların rəhbərləri isə qulaqlarına pambıq tıxadılar!
BNA xalqı hökumətdən narazı salır! İnsanlara qulaq asmaq, onları dinləmək lazımdır. Bir yoxlayın, görün, BNA-nın əməkdaşları nə işlə məşğul olurlar?
Bir çoxu saqqalı olan əməkdaşlar sürücülərə göz verib, işıq vermirlər! Bunlara bir deyən gərək: Əvvəl gedin, üz-gözünuzdə qayda yaradın, sonra xalqın içərisinə çıxın!
Xeyrəddin QOCA,
Yazıçı
