“BakuBus” nəqliyyat şəbəkəsinə aid avtobusların hərəkətinin onlayn izlənməsi üçün mobil tətbiq 3 aydan çoxdur ki, işləmir.
Bu barədə çoxsaylı sərnişin şikayət edib.
Dediklərinə görə avtobusların intervalının tənzimlənməsi və məlumatları onlayn izləmə imkanına malik mobil tətbiqin işləməməsi onların işini çətinləşdirib.
Hansı ki, sözügedən mobil tətbiq vasitəsilə avtobusların hərəkət istiqamərindən tutmuş dayanacağa çatma vaxtına qədər məlumatları almış olurdular. Mobil tətbiqin işlək vəziyyətdə olmaması sərnişinləri xeyli müddət dayanacaqda vaxt itirmələrinə və informasiyasızlığa vadar edir.
Dəfələrlə Bakı Nəqliyyat Agentliyinə (BNA) müraciət etsək də, qurum suallarımızı cavabsız qoyub.
Xatırladaq ki, bir müddət əvvəl də “BakuBus”-un mobil tətbiqinin işləməməsi ilə bağlı BNA-ya müraciət etmişdik. Qurumun mətbuat katibi Mais Ağayev sistemdə yenilənmə işlərinin aparıldığını vurğulayaraq, yaxın vaxtlarda yenidən sərnişinlərin xidmətinə veriləcəyini demişdi.
Problem isə dəyişməz olaraq qalır.
Qeyd edək ki, bu gündən etibarən MİDA-Yasamal Yaşayış Kompleksi ilə Bakı Ağ Şəhər yaşayış sahəsini əlaqələndirəcək yeni 10 nömrəli müntəzəm marşrut xətti üzrə avtobuslar sərnişinlərin istifadəsinə verilib. Həmin avtobus xəttinin hərəkət sxemi də “BakuBus” mobil tətbiqinə daxil edilməyib.Bizim.media
