image-ads_2000x150
image-lavrov-mirzoyanbackend

Lavrovun İrəvan qovluğunda nə var? – Ankaranın sərt MESAJI 

image-ads_728x90

“Rusiyanın xarici işlər naziri Sergey Lavrovun Türkiyədən Ermənistana getməsi təsadüfi deyil. Görünən odur ki, Sergey Lavrov Ankaranın son ismarışını İrəvana çatdıracaq”.

Bunu Publika.az-a açıqlamasında politoloq Cümşüd Nuriyev Rusiyanın xarici işlər naziri Sergey Lavrovun İrəvan səfərini şərh edərkən deyib.

Politoloq bildirib ki, hazırda Rusiyanın NATO blokundan yeganə ortağı Türkiyədir: “Ankara öz üzərinə çox böyük məsuliyyət götürərək, NATO-nun digər üzvlərinin qərarlarını birmənalı şəkildə qəbul etmək istəmir. Üstəlik, Türkiyə Rusiya ilə çoxtərəfli əməkdaşlıq münasibətlərini də saxlamaqdadır. Ankaranın Kremllə münasibətlərini qorumasının əsas səbəbi əlbəttə Azərbaycandır. Söhbət Azərbaycanın regiondakı əsas problemi olan Qarabağla bağlı məsələlərdir. Çünki bu münaqişə hələ tam şəkildə həll olunmayıb. Ona görə də Türkiyə Azərbaycana görə Rusiyaya müəyyən güzəştlər etməkdədir”.

Politoloqun fikrincə, Ankara beynəlxalq aləmdə də Rusiyanın maraqlarını təmin edir:

“Qısa müddət ərzində Rusiya ilə Türkiyə arasındakı ticarət dövriyyəsi 16 milyard dollara çatıb. Bu, çox böyük rəqəmdir. Söhbət 4 ayın ticarət dövriyyəsindən gedir. Ehtimal olunur ki, bu göstərici ilin sonuna qədər 50 milyard dolların üzərində olacaq. Rusiya Türkiyə, Türkiyə də Rusiya üçün böyük bazardır. Bundan başqa, Türkiyə xidmət sahəsində çox mühüm rol oynayan dövlətlərdəndir. Artıq Türkiyə Rusiyaya güzəştə getdi. Digər ölkələr Rusiyada verilən kartları qəbul etmir. Amma bu halda “MİR” köçürmə sistemi Türkiyədə aktiv işləyəcək. Bunun isə Rusiya rublunun möhkəmlənməsinə böyük təsiri olacaq. Nəzərə alaq ki, yay aylarında Türkiyənin turizmdən götürdüyü milyardlarla vəsait Rusiyanın milli valyutasını möhkəmləndirməyə kömək edəcək. Yəni Lavrov bütün bunları çox gözəl başa düşür. Ona görə də İrəvanda Azərbaycanla gərginliyə təcili şəkildə son qoyulmasını gündəmə gətirib. Mən belə düşünürəm. Ermənilərin ərazi, saxta soyqırımı iddialarından əl çəkməsini tələb edəcək. Ümumiyyətlə, Lavrovun İrəvan qovluğunda əsasən bu məsələlərin olduğunu düşünürəm. Məncə, danışıqlar masasına bu məsələlər mütləq şəkildə qoyulub və ya qoyulacaq”.

Cümşüd Nuriyevin sözlərinə görə, Sergey Lavrov Türkiyənin istəklərini mesaj şəklində Ermənistana çatdıracaq:

“Burada digər məsələ də ola bilər. Bu da Azərbaycanla Ermənistan arasındakı sərhədlərin təcili şəkildə tanınması məsələsidir. Hələlik sülh müqaviləsinin tezliklə razılaşdırılacağına inanmıram. Amma delimitasiya və demarkasiya, eləcə də dəhlizin açılması ilə bağlı Rusiyanın təkidi ortadadır. Kreml istəmir ki, regiondakı təşəbbüsü Şarl Mişel və ya Avropa İttifaqı öz üzərinə götürsün. Moskvadakı görüşdən sonra artıq Avropa İttifaqında, Brüsseldə üçüncü görüş nəzərdə tutulub. Bu o deməkdir ki, əgər Azərbaycanla Ermənistan arasındakı sadalanan məsələlər Brüssel görüşünədək həll olunmasa, Kreml Cənubi Qafqazdakı təşəbbüsü yenidən Avropa İttifaqına vermiş olacaq. Bu da Rusiyanın indiki durumuna uyğun gəlmir. Mənə elə gəlir ki, İrəvanda bu məsələlərin hamısı müzakirə olunacaq”.

image-ads_728x90

  • whatsapp
  • messenger
  • telegram
  • vkontakte
  • odnoklassniki