Fələstinli fəalların cib telefonu İsrail casus proqramları tərəfindən izlənilib.
Məlum olub ki, 6 fələstinli hüquq müdafiəçisinin mobil telefonları İsrailin NSO Qrupuna məxsus “Pegasus” adlı casus proqramı vasitəsilə izlənilib.
Alp.az xəbər verir ki, İrlandiyada yerləşən “Sərhəd Xətti Müdafiəçiləri” (FLD) insan haqları təşkilatının hesabatında 6 fələstinli fəalın mobil telefonlarında NSO Qrupa aid Pegasus casus proqramlarının aşkar edildiyi bildirilib.
Bildirilib ki, casus proqram 2020-ci ilin iyulundan 2021-ci ilin aprelinə qədər sözügedən fələstinli fəalların telefonlarına quraşdırılıb.
Bu təşkilatların heç biri İsrailin terrorçu siyahısında olmasa da, telefonların araşdırıldığı açıqlandıqdan sonra 3 təşkilatla birlikdə terror təşkilatları siyahısına daxil edilib.
Xəbərdə deyilir ki, fələstinli fəalların telefonlarına casus proqramı kimin quraşdırdığı məlum deyil.
Casus proqramın hədəf aldığı fələstinli fəallardan 4-nün işğal altındakı Şərqi Qüdsdə, 2-nin isə işğal altındakı İordan çayının qərb sahilində yaşadığı bildirilib.
Səudiyyəli jurnalist Camal Qaşıqçının qətlində də adı keçən NSO Group-a aid Pegasus casus proqramları tez-tez beynəlxalq ictimaiyyətin gündəmində olur.
ABŞ administrasiyası noyabrın 3-də NSO Group da daxil olmaqla 4 şirkəti xarici ölkələrə casus proqram satdıqlarını əsas gətirərək qara siyahıya salmışdı.
Fuad Məmmədov
