İki qardaş, iki tale, eyni zirvə… Onlar Goranboyda Musa kişinin ailəsində doğulmuşdular. Musa kişi halal zəhməti ilə igid övladlar böyütdü. Onlara vətən, torpaq sevgisini verdi. I Qarabağ savaşı başlayanda bütün goranboylular kimi, ailənin oğul payı olan Yaşar Ağalarov döyüşlərə qatıldı. Alp.az xəbər verir ki, Yaşar Ağalarov 1975-ci ilin noyabr ayının 29-da Goranboy rayonunun Xanqərvənd kəndində anadan olub. O, orta məktəbi bitirdikdən sonra 1993-cü ilin noyabr ayında hərbi xidmətə çağrılıb. Bir çox ağır əməliyyatların iştirakçısı oldu. Cəmi 18 yaşı olsa da Yaşar igidliyi, qəhrəmanlığı ilə dastan yazmağı bacardı. 1994- cü ilin aprel ayının 26-da Tərtər rayonunun Seyidsulan və Qapanlı kəndi uğrunda gedən döyüşlərdə itkin düşdü. Bu ailəni, igid övladlar böyüdən Musa kişini sındırmadı. Məhz vətənə bağlılığın sevginin nəticəsi idi ki, ailənin digər övladı Nahid hərb sənətini seçdi.
Nahid Ağalarov 1983-cü il dekabrın 14-də Goranboy rayonunda Xan Qərvənd kəndində anadan olub.
Azərbaycan Ordusunun baş çavuşu olan Nahid Ağalarov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Xocavəndin azadlığı uğrunda gedən döyüşlərdə savaşıb. Nahid Ağalarov noyabrın 23-də Şuşa istiqamətində minaya düşməsi nəticəsində şəhid olub.
Ailəli idi. Bir övladı yadigar qaldı.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Nahid Ağalarov ölümündən sonra “Vətən uğrunda” medalı ilə təltif edildi.
Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Nahid Ağalarov ölümündən sonra “Xocavəndin azad olunmasına görə” medalı ilə təltif edildi.
Ruhları şaddır!
