Torpaqlarımızın işğaldan azad edilməsi uğrunda gedən qızğın döyüşlərdə şəhidlik zirvəsinə ucalan igidlərimizdən biri də Beyrək Feyzullayevdir. Ölümündən sonra “Vətən uğrunda” və “Cəbrayılın azad olunmasına görə” medalları ilə təltif olunan qəhrəmanımız sanki adını daşıdığı tarixi qəhrəmanımız Beyrəyin ruhunu da daşıyıb özündə… Göstərdiyi şücaətlər və şərəfli ölümü bunu deməyə əsas verir.
Beyrək Fezullayev 30 aprel 1997-ci ildə Oğuz rayonu Baş Daşağıl kəndi, Malıx yaşayış sahəsində anadan olub. 2003-cü ilə Malıx əsas məktəbinə daxil olmuşdur. 2012-ci ildə həmin məktəbin 9-cu sinfini bitirib. Daha sonra Ağdaş şəhərinin Abad kənd məktəbində 10-cu sinifi davam etdirib. 2014-cü ildə həmin məktəbi bitirib. Subay idi. Həqiqi hərbi xidmətini Naxçıvanda Hava Hücumundan Müdafiə bölməsində nümunəvi əsgər kimi başa vurduqdan sonra hərbiçi kimi fəaliyyətini davam etdirib. Ən böyük arzusu Xüsusi Təyinatlı Qüvvələrdə xidmət etmək olub. Bunun üçün də əlindən gələni edib. Ən çətin sınaqlardan hesab olunan SAT komando kurslarını, ardınca Yaşmanın 6 aylıq kurslarını müvəffəqiyyətlə başa vurub. Beləliklə, Vətən müharibəsinin ilk günündən ön xətdə və ən qaynar nöqtələrdə vuruşan xüsusi təyinatlıların qrupunda Beyrək də yer alıb…
Döyüşlərdən 12-13 gün əvvəl təlim zamanı qayadan yıxılaraq əlini zədələmişdi. Rentgen zamanı əlində 2 yerdə sümük qırıldığı məlum oldu. Əlinə gips qoydular. Elə döyüşlərə də elə getdi. Deyirdi XTQ-nin əsgərini belə şeylər dayandıra bilməz.
Cəbrayıl-Füzuli rayonu istiqamətində gedən şiddətli döyüşlərdə ağır yaralanmasına baxmayaraq döyüşü davam etdirən igidimiz daha sonra şəhadətə yüksəlib. Döyüş yoldaşlarının dediyinə görə, qəhrəman şəhid 30-dan çox ermənini məhv edib. Gülləsi bitdikdən sonra da əlbəyaxa döyüşüb. Həmçinin düşmənin bir neçə texnikasını içərisindəki hərbiçilərlə birgə sıradan çıxarıb. Adı dastandan götürülən, növbəti dastanı da elə özü yazan Beyrəyin qəhrəmanlığı, igidliyi danışmaqla bitməz. Bu gün qəhrəman şəhidimizlə nəinki onun valideynləri, doğmaları, bütün Azərbaycan qürur duyur, fəxr edir… Uğrunda canından keçdiyi bu torpaq hələ neçə Beyrəklər yetişdirəcək. Qəhrəmanlarımızın adı daim yaşayacaq, şücaətləri isə dastanlara yazılıb, dillər əzbəri olacaq…
