ABŞ-ın Merilend ştatının koronavirusdan peyvənd olunan sakinləri lotereyada 40-400 min dollar qazanma şansı əldə ediblər. “RİA Novosti”nin məlumatına görə, bu barədə ştatın qubernatoru Larri Hogan bəyan edib.
“Merilend sakinlərini koronavirusdan peyvəndlənməyə təşviq etmək üçün, Merilend lotereyası 25 May – 3 İyul tarixlərində hər gün bir peyvənd olunana 40.000 dollar (68 000 AZN) mükafat verəcək. İyulun 4-də isə (ABŞ-da Müstəqillik Günü) final oyununda vaksindən keçənlərdən biri 400 min dollar mükafat alacaq”, – deyə qubernatorun saytında bildirilib.
Qeyd olunur ki, Dövlət Səhiyyə Departamenti 18 yaşdan yuxarı peyvənd olunmuş hər bir şəxsə təsadüfi bir say təyin edəcək, sonra isə təsadüfi say generatoru qalib seçəcək.
