“Biz otuz ildir ki, ermənilərin işgəncəsinin əzabını çəkirik. Bu illər ərzində mən həkimlərdəyəm, müalicə olunuram. Otuz ildir o orqanım yoxdur ki, müalicə olunmasın. Çəkmədiyim dərd, yük qalmadı və indi də onkoloji xəstə olmuşam. Bu ermənilərin bizə verdiyi işgəncənin nəticəsidir”
Bunu Moderator.az-a açıqlamasında Xocalı faciəsi zamanı səkkiz gün erməni əsirliyində qalan və olmazın işgəncələrinə məruz qalan Dürdanə Ağayeva deyib. D.Ağayeva ermənilərin əsirlərə etdikləri vəhşiliklərə görə bir gün Allah qarşısında cavab verəcəklərini bildirib:
“Xocalı faciəsinin törədilməsində iştirak edən Seyran Saroyanın ayağı kəsiləcək, qoy kəsilsin və görsün biz azərbaycanlılar nə çəkmişik. Xocalı faciəsində bunlar bizi qırdılar, soyqırım törətdilər və o soyqırımın qurbanı olan hələ kişiləri demirəm, qadınlar belə ayaqsız gəzir. Bəs bunlar bilmirdilər ki, o körpə uşağa silah qaldıran əllər bir gün sınacaq, ayaqlarını don vurub ölən körpələrin ahı onları tutacaq. Saroyanın ayağı kəsiləcək, cəhənnəmə kəsilsin, bizim ahımız yerdə qalmayacaq. On yeddi yaşlı azərbaycanlının başı erməni məzarının üstündə kəsiləndə ermənilər fikirləşmirdi ki, bu günlərdən bizim üçün də var?! Xocalının qız-gəlinini alçaltdılar. Otuz ildir ki, erməni işgəncəsinin zülümlərini yaşayıram. Bundan sonra qalan ömrümdə də o işgəncə mənim beynimdən silinməyəcək. O qədər içim doludur ki, hətta “Erməni zindanında səkkiz gün” adlı kitab da yazdım. Kitabda içimdəkiləri yazdım, amma içimdə, qəlbimdə o qədər deyilməyən şeylər var ki, bütün bunları dilimə gətirmək ağırdı. Ermənilər insanlıqdan uzaq bir toplumdur.
Yaşasın müzəffər ordumuz, Ali Baş Komandanımız, mənim Azərbaycanım. Az da olsa qisasımız alındı, hələ mənim ürəyim soyumayıb. Torpaqlarımız işğaldan azad edildi, Xankəndi və Xocalı rayonlarımız da işğaldan azad ediləcək. Nə qədər ki, mənim şəhid Xocalım işğal altındadır, mənə rahatlıq yoxdur. Ali Baş Komandanımız necə ki, 44 günlük Vətən müharibəsində Şuşamızı, Kəlbəcərimizi, Ağdamımızı, Füzulimizi, Cəbrayılımızı, Qubadlımızı işğaldan azad etdi, inanıram ki, Xocalı və Xankəndini də işğaldan azad edib, bizlərə hədiyyə edəcək. Allah ordumuzu, Azərbaycanımızı qorusun, Ali Baş Komandanımıza can sağlığı versin ki, o, ömürlük bir tarix yazdı.
Bir gün gələcək və ermənilər bizim torpaqlarda kirayə qaldıqlarını başa düşəcəklər. Erməni əsgərlərin anaları fəryad edir və bəs onlara deyən var idi balalarınızı bizim torpaqlara göndərin? Bu gün sanki biz xocalılar yaddan çıxırıq, unuduluruq. Mən bunu hiss edirəm, bilirəm. Azərbaycanda otuz minə yaxın şəhid var, hamısının ruhu qarşısında baş əyirəm, onlar mənim övladım kimidir”.
Qeyd edək ki, Xocalı faciəsinin törədilməsində yaxından iştirak olan Seyran Saronyanın səhhəti pisləşib, ayaqlarında çürümə getdiyi üçün həkimlər onu ayağını kəsmək niyyətindədir.
