Silahlı qüvvələrin etibarlı rabitə sistemləri ilə təmin olunmaması müharibə başlamamış ordunun məğlubiyyətə düçar olması kimi dəyərləndirilə bilər. Sülh və savaş dönəmində, aralıqsız şəkildə potensial rəqiblərin rabitə sistemlərinin “dinlənməsi” hərbi təhlükəsizliyin vacib detallarından biridir.
Etibarlı rabitə sistemi dedikdə radiodalğaların kəsintisiz və ya güclü olması qədər düşmən tərəfindən dinlənə bilməməsi də nəzərdə tutulur. Məhz bu sahədə meydana çıxan boşluqlar məğlubiyyətin görünməz “iz”ləri, səssiz “əcəl zəngləri”dir.
Ermənilərin hərbi radioelektron, rabitə sistemini dərindən analiz edən Azərbaycan Silahlı Qüvvələri labüd savaş ssenarisində düşmənin rabitə əlaqələrinin izlənməsi və dinlənməsi, eləcə də əlaqəyə müdaxilə detallarını nəzərdən qaçırmamışdı. Ordumuzun düşmən radiodalğalarında fırtına qoparan sitemlərlə təminatında ən önəmli yeri təbii ki, qardaş ölkənin təmsilçisi olan ASELSAN tutur.
Etibarlı mənbələrdən əldə etdiyimiz məlumata görə 44 günlük Vətən savaşından öncə və savaş günlərində ASELSANın comint (communication intelligence) sistemləri vasitəsi ilə düşmənin səs və məlumat yüklü radio dalğalarının axışını hədəf alan kommumikasiya kəşfiyyatı Silahlı Qüvvələrimizə bir çox üstünlüklər qazandırmışdır. Məlumata görə, müharibənin gedişində ASELSANın comint sitemləri vasitəsi ilə düşmənin hər gün orta hesabla 80 məlumatını dinləmək və lokasiyalarını təyin etmək imkanımız olub.
Ümumiyyətlə, ASELSAN hərbi sahədə istifadə oluna biləcək müxtəlif spektrli elektron yardım (ED elektronik destek) və elektron müdaxilə (ET elektronik taarruz) sistem vasitələrinə malikdir və bunların bir çoxu artıq Silahlı Qüvvələrimizin ixtiyarındadır.
Anar Şuşalı
Hərbi jurnalist
