Bu günlərdə Böyük Britaniya hökuməti Ekvatorial Qvineya prezidentinin oğlu və eyni zamanda ölkənin vitse-prezidenti Teodoro Nqema Obianq Manqeyə və daha bir neçə əcnəbi korrupsionerə qarşı sanksiyalar tətbiq etdi. Londonda əmindirlər ki, bu Afrika ölkəsinin vitse-prezidenti öz ölkəsinin vətəndaşlarının hesabına cibini doldurub, özünün harın, dəbdəbəli həyat tərzini maliyyələşdirmək üçün yüz milyonlarla dollar xəcrləyib. İndi onun aktivləri dondurulub və Böyük Britaniyaya girişi qadağan edilib. Alp.az xəbər verir ki, buna cavab olaraq Ekvatorial Qvineya hakimiyyəti Böyük Britaniyadakı səfirliyini bağlayacağını bildirib.
Vitse-prezident Teodoro Obianqo Manqe
Əslində Ekvatorial Qvineyanın vitse-prezidenti neçə vaxtdır özünün İnstagram səhifəsində yüz milyonlarla dolları gözəl qadınlara, əyləncələrə, biznes-jetlərə, bahalı avtomobillərə, yaxtalara, malikanələrə və dəbdəbəli geyimlərə necə səpələdiyini geniş təbliğ edirdi. İndi isə onun bütün sərvəti əlindən çıxa bilər-eyni zamanda bir neçə ölkə bu ərköyün varisin bank hesablarını dondurub və öz ərazisinə girişini qadağan edib.
Böyük Britaniyanın Xarici İşlər Nazirliyinin məlumatında deyilirdi ki, Teodoro Obianq Manqe 1998-ci ildən bəri ən azı 500 milyon dollar xərcləyib, Parisdə 100 milyon dollara malikanə , 38 milyon dollara özəl təyyarə, bir çox digər ölkələrdə çoxsaylı iqamətgahlar və s. alıb. Ekvatorial Qvineyada isə əhalinin üçdə birinin heç tualeti də yoxdur. Əhalinin 80 faizə yaxını yoxsulluq həddində yaşayır.
Teodoronun müsadirə edilən avtomobilləri: onların satışından əldə olunan pullar yenə özünə qayıtdı?
Teodoroya qarşı hələ 7 il əvvəl ABŞ hakimiyyəti sanksiya tətbiq edib və onun bütün əmlakını müsadirə edib. Fransa da bu afrikalı siyasətçinin aktivlərini müsadirə edərək onu qiyabi olaraq 3 il həbs cəzasına, 30 milyon dollar cərimə ödəməyə məhkum edib. 2016-cı ildə İsveçrə hakimiyyəti antikorrupsiya araşdırmaları çərçivəsində Teodoronun 20 ədəd dəbdəbəli avtomobilini əlindən alıb. Bunların arasında “Aston Martin One-77”, “Bugatti Veyron”, “McLaren P1”, “Ferrari 599 GTB”, “Ferrari LaFerrari” avtomobilləri də var. Həmin avtomobillər sonradan “Bonhams” hərrac evi tərəfindən satılmışdı. Avtomobillərin içərisində 2014-cü ildə buraxılmış “Lamborghini Veneno” diqqəti xüsusi cəlb edirdi, onu hərracda 8.4 milyon dollara aldılar. Amma hərracda toplanan pulları İsveçrə Ekvatorial Qvineyadakı xeyriyyə təşkilatına göndərdi və belə görünür ki, həmin pullar yenidən Obianq Manqenin ailəsinin əlinə keçdi. Çünki ölkədə bütün strukturlar hakim ailənin nəzarətindədir.
Teodoronun atası 50 ildir prezidentdir…
Teodoronun atası Teodoro Obianq Nqema Mbasaqo ölkəyə 40 ilə yaxındır rəhbərlik edir. Onu Afrikanın ən qəddar diktatorlarından biri adlandırırlar. Mbasaqo öz dayısı Fransisko Masias Nqema Ndonqanı devirərək hakimiyyətə gəlib. Hansı ki, Ekvatorial Qvineya sakinləri onu az qala allah hesab edirdilər, çünki Mbasaqo əhalini buna məcbur edirdi. Kilsələrdə ikonalar əvəzinə onun portretləri asılırdı, Mbasaqo məktəbləri, kitabxanaları, teatrları bağlamışdı, eynək taxmağı qadağan etmişdi, ziyalıların kökünü kəsirdi və dövlətin xəzinəsini öz çarpayısının altında saxlayırdı.
Ağlını itirmiş bu diktatoru 1979-cu ildə güllələdilər, üstəlik onun qohumunun-indiki prezidentin əmri ilə. Teodoro Obianq Nqema Mbasaqo dayısına nisbətən daha mötədildir, məktəbləri, kitabxanaları açdırıb, gözləri zəif görənlər eynək taxa bilir. Amma o da ölkənin bütün sərvətlərini öz əlində cəmləyib, o cümlədən böyük qızıl, neft, qaz və almaz ehtiyatlarını.
Ekvatorial Qvineya prezidentinin oğlu xaricdə oxuyub. Əvvəlcə Fransada özəl məktəbdə, daha sonra Kaliforniyadakı özəl Pepperdayn universitetində. Lakin Teodoro təhsili yarımçıq buraxıb, hərçənd bu Afrika ölkəsində onun təhsilini başa vurduğunu iddia edirlər.
1998-ci ildən başlayaraq atası Teodoronu müxtəlif nazir postlarına, sonra vitse-prezident təyin edib və onu özünün qeyri-rəsmi varisi kimi tanıdıb. Lakin bu cür məsul vəzifələr oğul Teodoronun həyat tərzini çox az dəyişib-o, dəbdəbə içərisində üzməyi sevir və günün əyləncələrdə keçirir. Və vaxtaşırı olaraq qalmaqalların mərkəzində yer alır. Vitse-prezidentin dünyanın hər yerində daşınmaz əmlakı var. O cümlədən Cənubi Afrika Respublikasında iki malikanəsi, Malibuda isə 31 milyon dollar aldığı bir malikanəsi. Əlbəttə, dəbdəbəli yaxtaları-bunlardan “Ebony Shine” yaxtasında yeddi böyük kayut, üç qonaq otağı, kinoteatr, vertolyot meydançası, idman zalı və s. var. 90 metrlik “Ice” adlı superyaxtanı isə Teodoro üçün 2005-ci ildə hazırlayıblar, ən qabaqcıl texnologiyalar tətbiq etməklə.
2018-ci ildə vitse-prezident özəl təyyarə ilə 9 nəfərin əhatəsində Braziliyaya gedib. Yerli sərhədçilər nümayəndə heyətinin yükünü yoxlayıblar, məlum olub ki, sərnişinlərin 19 çantası var. Bu çantalarda 1.4 milyon dollar nəğd pul, ümumi dəyəri 15 milyon dollar olan 20 qol saatı var. Braziliya hakimiyyəti bu sərvəti müsadirə edib, Teodoroya cəmi 10 min dollar verib. Çünki ölkəyə rəsmən bəyan etmədən ancaq bu qədər pul keçirmək olardı.
Teodoro özü heç vaxt gizlətməyib ki, dəbdəbəli həyat tərzini sevir. Onun İnstagram-da yüz minlərlə izləyicisi var. Mikrobloqu dəbdəbəli kurortlarda çəkilmiş fotolarla doludur. Bu fotoların bir çoxunda Teodoro yarıçılpaq qızların əhatəsindədir. 2019-cu ildə o, ad gününü xüsusi təntənə ilə qeyd edib. Ağ kostyum və qırmızı qalstuk geyən Teodoro qızılı örtüklə əhatə olunmuş, uzunluğu bir metr olan ağ tortu kəsib. Məhz onun sosial şəbəkələrdəki fotoları antikorrupsiya orqanlarının diqqətini cəlb edib və Teodoronun sərvətinin bir hissəsini əlindən alıblar. Amma Ekvatorial Qvineyada sərvətlər boldur və deməli o, öz həyat tərzini dəyişib daha az xərcləməli olmayacaq…
Ekvatorial Qvineya neft hasilatına görə Afrikada lider ölkələrdən birinə çevrilib, amma neft satışından əldə olunan pulların böyük hissəsi sadə vətəndaşlar üçün əlçatmazdır. Oğul Teodoro və atası isə həm ölkə içində, həm xaricdə başgicəlləndirici məbləğləri dəbdəbəyə sərf etməkdən çəkinmirlər.virtualaz.org
