İsrailin müdafiə naziri Beni Qants İranın nüvə üsilahı əldə etməyə cəhdindən və İsrail ordusunun İran torpağında keçirdiyi əməliyyatlardan danışıb.
İyulun 4-də bu ölkənin 13-cü hərbi telekanalına açıqlamasında Beni Qants deyib ki, İsrail özünü qorumaq üçün İran İslam Respublikası ilə üz-üzə durmağa hazırdır.
“İran yaxşı bilir ki, biz əməliyyatlarımızı onun torpağında həyata keçiririk. Biz İranın nüvə silahına yiyələnməsinin qarşısını almaqda qərarlıyıq. Biz İranın regionda apardığı mənfi və təxribat xarakterli fəaliyyətini qəbul etmirik. Güman edirəm ki, İran rəhbərləri yaxşı bilirlər ki, biz artıq hərəkətə keçməyə hazırıq.
Biz, özümüzü müdafiə etmək üçün İranla üz-üzə durmaq ərəfəsindəyik. Bİz İrana zərbələr endirməklə yanaşı, həm də rəsmi Tehranın Livana nüfuzunun qarşısını almağa çalışırıq. İran Livanda səssiz bir çevriliş etməyə çalışır.
İranlı qurumlar addım-addım Livana nüfuz edir, bu ölkənin Livanda yatırdığı investisiyanın həcmi getdikcə artır. Bundan başqa İranın radikal ideologiyası və silahları da Livana daxil olur. Bunlar isə güman edirəm ki, Livana, onun xalqına və regiondakı sülhə qarşı ciddi bir təhlükədir.
Mən isə hesab edirəm ki, İranın bütün bu dağıdıcı hərəkətlərinin qarşısı alınmalıdır”, -deyə İsrailin müdafiə naziri Beni Qants bu ölkənin 13-cü hərbi telekanalına açıqlamasında bildirib.
