Onlar ABŞ-ın Ayova ştatında yaşayan Alleta və Tom Sallivanların oğulları idilər. Böyüyünün 28, kiçiyinin 20 yaşı vardı.
Amerikanın İkinci dünya müharibəsinə qoşulmasından bir ay sonra bir yerdə hərbi xidmət keçmələri şərti ilə orduya yazıldılar. İki böyük qardaş, Corc və Frenk daha əvvəl donanmada xidmət etdiklərindən, qardaşların beşini də donanmaya yazdılar və onlar “USS Juneau” yüngül kreyserində xidmətə başladılar.
“USS Juneau” bir müddət Atlantik okeanında gəmi karvanlarını müşayiət etdi. Avqustun sonlarında isə Sakit okeana yollandı.
Həmin vaxt burada Quadalkanal uğrunda döyüşlər başlamışdı. “USS Juneau” da üç ay ərzində irili-xırdalı bir sıra döyüşlərdə iştirak etdi.
Noyabrın 13-ə keçən gecə “USS Juneau”nun daxil olduğu gəmilər qrupu Solomon adalarından biri olan Savo adası yaxınlığında yaponların daha çoxsaylı qrupu ilə döyüşə girdi. Yapon qüvvələrinə əfsanəvi admiral, Perl-Harbora hücumu həyata keçirən İsoroku Yamamoto rəhbərlik edirdi.
Gecə döyüşü zamanı “USS Juneau” torpedo dəyməsi səbəbindən ciddi xəsarət aldı. O, döyüşdən çıxaraq təmir üçün limana üz tutdu. Gündüz saat 11 radələrində isə yapon sualtı qayığı tərəfindən hücuma məruz qaldı. Yaponların buraxdığı torpedo “USS Juneau”nun döyüş zamanı xəsarət aldığı yerə dəydi. Gəmi ikiyə bölündü və bir neçə saniyə müddətində batdı.
Heyətdən yalnız 10 nəfər sağ qaldı, 687 nəfər, o cümlədən Sallivan qardaşları həlak oldu. Hadisə geniş rezonans doğurdu. 1943-cü ilin dekabrında istifadəyə verilən mina gəmisinə “Sallivanlar” adı verildi. Bu, ABŞ tarixində ilk dəfə idi ki, gəmiyə bir yox, daha çox adamın adı verilirdi.
Həmin hadisədən sonra ABŞ Müdafiə Nazirliyi “Axırıncı sağ qalan” qaydasını tətbiq etdi. Bu qaydaya görə, bir ailənin yeganə sağ qalan övladı hərbi xidmətdən azad edilirdi. Bu qayda sonralar qanun şəklinə salındı.
1944-cü ildə dörd Niland qardaşlarından üçü həlak oldu: biri Birmada, ikisi Normandiyaya qoşun çıxaranda. Dördüncü qardaş Frederik Niland hərbi xidmətdən azad olunaraq evə göndərildi. Bu hadisə qismən “Sıravi Rayanı xilas etmək” filminin süjeti oldu. Doğrudur, real həyatda 1 il sonra məlum olmuşdu ki, Birmadakı qardaş ölməyib, yapon əsir düşərgəsində imiş.
“USS Juneau” gəmisi 2018-ci ildə Solomon adalarının yaxınlığında 4200 metr dərinlikdə tapıldı.
Yadigar Sadıqlı
