Ukraynanın daxili işlər naziri, 2014-cü il Maydan hərəkatı nəticəsində baş vermiş hakimiyyət dəyişikliyindən bəri həmin vəzifəni tutan Arsen Avakov istefa ərizəsi yazıb. Bu haqda Ukrayna KİV-ləri yazır. Hakim “Xalqın xidmətçisi” fraksiyasından məlumatı təsdiqləyiblər. Bildirilir ki, daxili işlər naziri istefa ərizəsini prezident Vladimir Zelenskiyə təqdim edib.
Arsen Avakov milliyyətcə ermənidir, Bakıda anadan olub və daxili işlər naziri olandan sonra Ukrayna hakimiyyətində ən güclü fiqurlardan birinə çevrilib. Eyni zamanda yüz milyonlarla dollarlıq sərvət toplayıb.
Avakovun istefasının mümkün səbəbləri haqda hələlik məlumat yoxdur, amma Rusiya Federasiya Şurasının beynəlxalq məsələlər üzrə komitəsinin üzvü Sergey Tsekov lenta.ru-ya şərhində üç mümkün səbəb haqda danışıb.
Senatorun fikrincə, daxili işlər naziri ona görə istefa ərizəsi yaza bilərdi ki, ondan qalıb işləməyi xahiş ediblər. “Mən hesab edirəm ki, bu oyun ola bilər. Axı o hesab edir ki, Ukraynada stabilliyi qoruyub saxlayan məhz özüdür”,-senator bildirib.
Daha bir mümkün səbəb isə, rusiyalı senatora görə, prezident Zelenskinin tapşırığı ilə Avakov barəsində kompromatların toplanması ola bilər.
“Prezidentin də xoşuna gəlmir ki, Avakov belə müstəqil siyasətçidir və prezident elə də əhəmiyyət vermir. Deyiblər ki, ərizəni yaz, yoxsa bütün bunları açıb göstərərik”,-Tsekov təxmin edir.
Nəhayt üçüncü səbəb bu ola bilər ki, Avakov vəziyyətin qarışmağa doğru getdiyini hiss edib. “Ola bilsin hesab edib ki, indiki hakimiyyət situasiyanın öhdəsindən gələ bilmir, mövqelərini itirir və ona görə də ərizəsini yazıb”,-rusiyalı siyasətçi bildirib.
