Qəbələnin Əmirvan kəndinin 7 şəhidi var. Bu kənd Birinci Qarabağ müharibəsində 3, İkinci Qarabağ müharibəsində isə 4 şəhid verib. Onları vətən, torpaq, bayraq sevdası birləşdirirdi. Həmin kəndin qəhrəman şəhidi polkovnik-leytenant Əfqan Abdurəhmanovun bu gün doğum günüdür.
Əfqan Abdurəhmanov 1976-cı il mayın 25-də Qəbələnin Əmirvan kəndində dünyaya göz açıb. Birinci Qarabağ münaqişəsi başlayanda artıq yeniyetmə olan Əfqan Vətən torpaqlarının düşmən tərəfindən işğal edilməsi ilə heç cür barışa bilmirdi. Bu səbəbdən hərbiçi olmaq və erməni işğalı altında olan torpaqlarımızın azad olunmasında iştirak etməyi qarşısına məqsəd qoymuşdu… Elə məqsədinə də çatır. Hərbi xidmətdən qayıtdıqdan sonra Heydər Əliyev adına Azərbaycan Ali Hərbi Məktəbini, ardınca Silahlı Qüvvələrin Təlim və Tədris Mərkəzininin kurslarını uğurla başa vurur. Xidmətdə olduğu 26 il müddətində Türkiyə, Çexiya və Çində təlimlərə qatılır, qüsursuz xidmətinə görə bir sıra medallarla təltif edilir. Aprel döyüşlərində də ön cəbhədə silahdaşları ilə vuruşan Əfqan Abdurahmanov Vətən müharibəsinin ilk günlərdən döyüşə atılır. Polkovnik-leytenant Murovdağ zirvələrindən birinin düşməndən azad edilməsində qəhrəmanlıq göstərir. Hansı ki, bu əməliyyat nəticəsində ordumuz bəzi mövqələrdə hərbi üstünlük əldə edir. Ardınca Suqovuşan istiqamətində döyüşlərdə tabeliyində olan əsgərlərlə birlikdə şücaətlə vuruşur. Əfqan dövlətinə, torpağına bayrağına sevdalı zabit idi. Ailəsi deyir ki, Murad Mirzəyevin, Polad Həşimovun şəhid olması ona çox pis təsir etmişdi. Və ilk fürsətdə onların qisasını alacağına söz vermişdi. Buna görə də hər zəngində qürurla danışır, silahdaşlarının qisasını aldığı üçün, düşməni torpaqlarımızdan qovub çıxardıqları üçün sevincli olduğunu deyirdi. Qəhrəman zabit elə sevdalısı olduğu Vətəni uğrunda da şəhadətə yüksəlir… Prezidentin sərəncamı ilə hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Əfqan Abdurəhmanova ölümündən sonra “Vətən Müharibəsi Qəhrəmanı” adı verildi. Qəhrəman zabit həmçinin “Vətən uğrunda” və “Suqovuşanın azad olunmasına görə” medalları ilə də təltif edilib…
