İran Güləş Federasiyasının başçısı Əlirza Dəbir tanınmış azərbaycanlı güləşçi Pərviz Hadini təhqir edib.
Güney Azərbaycanın tanınmış idmançısı Pərviz Hadi Olimpiada yarışlarına qatılmaq üçün lazım olan xalı toplasa da, İran Güləş Federasiyası tərəfindən adı siyahıdan çıxarılıb.
Bundan öncə də iki dəfə azərbaycanlı güləşçinin adı heç bir əsas olmadan olimpiadaya göndərilən idmançıların siyahısından silinmişdi.
Pərviz Hadi Taxt Kubokunda Tokio Olimpiadasının seçmə yarışında birinci yeri tutaraq qalib gəlib və ağır çəkidə İran komandasının təmsilçisi seçilib.
Koronovirus pandemiyası səbəbindən Olimpiya Oyunları təxirə salınıb və indi idmançılarının yeni siyahısını açıqlayıb.
Bəlli olub ki, federasiya heç bir səbəb göstərmədən P.Hadinin yarışlara qatılmasına qadağa qoyub.
Güneyli idmançı federasiyanın qərarına etirazını bildirib və mətbuata verdiyi müsahibədə haqq və ədalətin icra olunmasını tələb edib.
Buna cavab olaraq İran Güləş Federasiyasının başçısı Əlirza Dəbir televiziyada çıxışı zamanı azərbaycanlı güləşçini təhqir edib.
“Allah ona boy-buxunla yanaşı ağıl da versin”-deyə, federasiya rəhbəri idmançını aşağılayıb.
