Avqust 10-dan Azərbaycanda Məhərrəm ayı başlayıb. Aşura günü isə bu günə təsadüf edir. Bu il də Məhərrəmlik ayı və Aşura koronavirusla bağlı yaranmış təhlükəli və riskli dönəmə təsadüf edir.
Hazırda ölkədə koronavirus infeksiyasına yoluxma sayının və ölüm hallarının artdığı, sərt qapanmanın tətbiqinin yenidən gündəmə gəldiyi bir dövrdə kütləvi tədbirlərin keçirilməsi xəstəliyin yayılma sürətini daha da artıra bilər. Bəs pandemiya ilə mübarizə dövründə dini mərasimlər, ibadətlər necə həyata keçirilməlidir?
Qafqaz Müsəlmanları İdarəsinin əməkdaşı, AMEA-nın doktorantı, ilahiyyatçı-alim Samid Quliyevlə Aşura mərasimlərinin keçirilməsi ilə bağlı önəmli məqamları müzakirə etdik.
-Aşura mərasimlərini mövcud pandemiya şəraitində hansı qaydalar çərçivəsində qeyd etməliyik?
-Məhərrəm ayı Hicri-qəməri təqviminin birinci ayı, Qurani-Kərimin “Tövbə” surəsinin 36-cı ayəsində keçən dörd haram aydan biridir. “Məhərrəm” sözü də “haram olan”, “qadağan edilən”, “müqəddəs və hörmət olunan” kimi dilimizə tərcümə edilə bilər. Miladi təqvimlə 680-ci ilin oktyabr ayında (Hicri-qəməri təqviminin 61-ci ilinin məhərrəm ayının 10-da) məlum Kərbəla faciəsi baş verib, nəticədə Həzrət Peyğəmbərin (s) sevimli nəvəsi, İmam Əlinin (ə) oğlu İmam Hüseyn (ə) silahdaşları ilə birlikdə şəhid edilib.
Günümüzə qədər bu hadisə dünyanın bir çox müsəlman ölkəsində o, cümlədən Azərbaycanda qeyd olunub. Lakin builki Aşura və əzadarlıq mərasimləri mövcud pandemiya səbəbindən müəyyən məhdudiyyətlərlə keçiriləcək. Bu məsələyə Qafqaz Müsəlmanları İdarəsinin dindarlara etdiyi Müraciətdə də toxunulub, belə həssas məqamda qaydalara riayət etmək tövsiyə olunub. Dindarlarımız da, öz növbəsində, gigiyenik qaydalara əməl etməli, ara məsafəsi saxlamalı, tibbi maskalardan istifadə etməlidirlər. Bundan əlavə, əzadarlar insanların çoxluğunu nəzərə alaraq mərasimlərin təşkil olunduğu məscidləri növbəli şəkildə ziyarət etməli, ziyarət bitdikdən sonra məscidi tərk etməlidirlər ki, digərləri də ziyarətlərini rahat yerinə yetirə bilsinlər. Bu, həm də İslamın bizə vacib buyurduğu mömin qardaş və bacılarmızın haqqının qorunması olacaqdır.
Qeyd etmək lazımdır ki, bütün mərasimlərdə olduğu kimi, Aşura və əzadarlıq məclislərində də Kərbəla şəhidləri ilə yanaşı, torpaqlarımız və vətənimiz uğrunda şəhid olan övladlarımızın ruhları da hörmət və ehtiramla yad ediləcəkdir.
-Qanvermə aksiyaları keçiriləcəkmi?
-Bu il də qanvermə aksiyaları əvvəlcədən təyin olunmuş Mərkəzi Qan Bankı daxil olmaqla Sumqayıt, Quba, Şirvan, Lənkəran, Şəki, Mingəçevir, Gəncə və Bərdə bölmələrində həyata keçiriləcək. Bu təşəbbüs ilk dəfə olaraq Qafqaz Müsəlmanları İdarəsinin sədri Şeyxülislam Allahşükür Paşazadə həzrətləri tərəfindən verilsə də artıq respublikamızda ənənə halını alıb. Bildiyiniz kimi, qanvermə aksiyası qana ehtiyacı olan şəxslərə yardım etmək deməkdir və sağlam insanlar belə bir mübarək ayda bu nəcib təşəbbüsə qoşulmaqla neçə-neçə şəxsin həyatını qurtarmış olur ki, bu da dinimiz baxımından savab əməldir.
-Son günlərdə KİV-də məhərrəm ayında toy etməklə bağlı bəzi məlumatlar dolaşmaqdadır. Bu barədə fikirləriniz nədir?
-Dini bilgisi olan hər bir şəxs bilir ki, şəriətmizdə elə gün yoxdur ki, həmin gündə toy etmək haram hesab edilsin. Sadəcə müsəlman dünyasının bir parçası olan, Həzrət Peyğəmbərin (s) pak ailə üzvlərinə xüsusi məhəbbəti ilə seçilən xalqımız əsrlərdir ki, ehtiram əlaməti olaraq nəinki məhərrəm ayında, hətta həmin aydan sonra gələn səfər ayında da xeyir işlərini təxirə salıblar. Çünki İmam Hüseynin (ə) qırx mərasimi və Həzrət Peyğəmbərin (s) hüznlü vəfatı məhz bu aya təsadüf edir.sherg.az
