44 günlük Vətən savaşında öz qorxmazlığı cəsarəti ilə ad çıxaran neçə-neçə oğlumuz canını vətən yolunda fəda etdi. Onlar bu vətən üçün ən şirin olan canlarını belə əsirgəmədilər. Bu gün haqqında söhbət yazdığımız igid eloğlumuz Xəyalın ən böyük arzusu, haqqında bütün tərəkəmə elatının danıçdığı yaylaq yerlərini görmək idi. O, zəhmətkeş ailədə böyümüşdü. Qəhrəmanımızın bu gün doğum günüdür.
Xəyal Rahil oğlu Rəhimli, 09 iyun 1992-ci ildə Beyləqan rayonu Orta Əlinəzərli kəndində, sadə, halal ruzi qazanmaqla dolanan, zəhmətkeş bir ailədə dünyaya göz açıb.
O, 1999-cu ildə şəhid Kərəm Əliyev adına Orta Əlinəzərli kənd 2 nömrəli tam orta məktəbin 1-ci sinfinə daxil olub.
Xəyal 2008-ci ildə həmin məktəbin 9-cu sinfini bitirərək, fərdi əmək fəaliyyətinə başlayıb.
2010-cu ildə həqiqi hərbi xidmətə çağırılıb və Bakı şəhərində yerləşən “N” saylı hərbi hissədə xidmət edib. Xəyal Rəhimli, 2012-ci ildə ordu sıralarından tərxis olunub.
Hərbi xidmətini başa vurduqdan sonra, doğulub, boya-başa çatdığı doğma Əlinəzərli kəndinə qayıdıb. Xaraktercə çox sakit, üzüyola və səmimi olması, onu az bir müddətdə hər kəsin sevimlisinə çevrib.
27 sentyabr 2020-ci ildə təcavüzkar erməni silahlı qüvvələri atəşkəs razılaşmasını kobud şəkildə pozaraq, ölkəmizə qarşı genişmiqyaslı hərbi əməliyyatlara başladı.
Azərbaycan Respublikasının Prezidenti, Ali Baş Komandan, İlham Əliyevin imzaladığı 28 sentyabr 2020-ci il tarixli Sərəncama əsasən, Xəyal Rəhimli də, Ordu sıralarına çağırılıb. 29 oktyabr 2020-ci ildən xüsusi təlimlərdə iştirak edib və torpaqlarımızın yağı düşməndən, erməni terrorçularından təmizlənməsi uğrunda gedən qanlı döyüşlərə qatılıb.
Xalqımızın mərd oğulları, qəhrəman əsgərləri ilə birgə Xəyal Rəhimli də, torpaqlarımızın azadlığı və ərazi bütövlüyü uğrunda Vətən savaşına qatıldı.
O, Cəbrayıl və Qubadlı rayonlarının düşməndən azad edilməsi uğrunda gedən qanlı döyüşlərdə qəhrəmancasına şəhid olub.
Şəhidimiz Xəyal Rəhimlinin babası Rəhimov İbad Rəhim oğlu, Əlinəzərli və ətraf kəndlərdə və eləcə də, bütün rayonda yüksək hörmətə malik bir ziyalı olub.
Xəyalın digər babası, el ağsaqqalı Rəhimov Teymur Əliş oğlu da hər kəsin sevdiyi bir insan olub. İkinci dünya müharibəsinin iştirakçısı, hər birimizin yaxşı tanıdığı, Sovet İttifaqı Qəhrəmanı Mehdi Hüseynzadənin yaxın dostu və silahdaşı olub.
Teymur Rəhimov, 2019-cu ildə, 100 yaşında dünyasını dəyişmişdir!
Şəhidimizin atası Rahil Rəhimovun dedikləri:” Xəyal ailəmizdə böyüyən 5 uşaqdan biri, 4 bacının yeganə qardaşı, ailəmizin sonbeşiyi və bizim üçün övladlarımızın ən əziz olanı idi. O, mənim, arxa-dayağım, əlimdən tutanım, həm də, tək təsəlli yerim idi. Xəyalın ağıllı, sakit, etibarlı və ailəcanlı olması, aramızda qırılmaz bir bağ, daha dəqiq desəm, möhkəm dostluq münasibəti yaratmışdı. Biz, həm mehriban dost, həm də, sadiq sirdaş idik.
Onun yoxluğuna inanmıq mənim üçün çətindir və həmişə olduğu kimi, bu gün də, səbrsizliklə yolunu gözləyirəm. Nə vaxtsa təkrar qayıtması ümidi ilə yaşayıram.
Allah bütün şəhidlərimizə rəhmət etsin! Vətən uğrunda şəhid olmaq böyük bir nemətdir, əsl şərəfdir!”.
Şəhid anası Kifayət Rəhimova: “Xəyal, ailəsinə, valideynlərinə çox bağlı bir insan idi! O, uşaqlıqdan zəhmətkeş, əməksevər bir insan olub. Bütün işlərdə bizə yaxından kömək edər, ailəmizin yaxşı yaşamağı üçün bütün çətinliklərə sinə gərərdi. Övladlarımızın ən kiçiyi olduğu üçün onu daha çox əzizləyərdik, lakin buna baxmayaraq, o, çox tərbiyəli və öz yerini bilən bir uşaq kimi böyümüşdü. Vətən Müharibəsi başlayanda Xəyal mənə: “Ana, mən də Vətənimizə öz borcumu verməyə hazıram! Əgər səfərbərliklə çağırılmasam, könüllü olaraq qatılacağam döyüşlərə! Buna hazır olun!” dedi.
Müharibənin ən şiddətli vaxtlarında, imkan tapan kimi bizə zəng edərdi. Hər dəfə danışanda özünün və ümumi vəziyyətin yaxşı olduğunu bildirərdi, dönə-dönə özümüzə yaxşı baxmağımızı tapşırardı. Heç zaman orada baş verənlər haqqında bir söz deməzdi.
Bu yaxınlarda döyüş yoldaşları gəlmişdi bizə. Xəyalın keçdiyi döyüş yolu haqqında xeyli danışdılar. Onlarla olduğu 10 gün müddətində yaxşı hörmət qazanıbmış şəhid oğlum.
Mən, bütün şəhid ailələrinin adından 30 ilə yaxın həsrətində olduğumuz doğma Qarabağ torpaqlarını 44 gün ərzində düşmən əsarətindən azad edən, xalqımıza Qələbə sevinci yaşadan Prezidentimiz, cənab İlham Əliyevə, birinci vitse-prezident, xanım Mehriban Əliyevaya və Şanlı Ordumuzun əsgərlərinə minnətdarlığımı bildirirəm! Möhtəşəm Qələbəmiz münasibətilə, onları təbrik edir və möhkəm can sağlığı arzulayıram!”.
Xəyalın bacısı Aygün Rəhimova:”Xəyal dünyaya göz açanda, mən 8-ci sinifdə oxuyurdum. Qardaşım üçün qurbanlar kəsildiyi indiki kimi yadımdadır. Onun gəlişi, ailəmizə qucaq dolusu sevinc, misli görünməyən böyük bir xoşbəxtlik gətirmişdi. Mənə həddindən artıq bağlı idi. Mən ona həm ana, həm bacı, həm də, sirr ortağı idim.
Bu gün də, dönməyəcəyini bilə-bilə, gözüm hər yerdə onu axtarır. Qardaşımın şəhid olduğu gün heç zaman yadımdan çıxmaz!
Özüm də, “N” saylı hərbi hissədə mülki işçi kimi çalışıram. Vətən Müharibəsi zamanı biz də Vətən qarşısında xidməti vəzifəmizi yerinə yetirirdik. Əsgərlərimizə dualar edir, səbrsizliklə Qələbə qazanacağımız günü gözləyirdik. Qazandığımız bu möhtəşəm Qələbədə, zəhməti keçən, xidməti olan hər kəsə öz təşəkkürümü bildirirəm! Müalicə alan qazilərimizə can sağlığı arzulayır və tezliklə doğmalarına qovuşmalarını diləyirəm!”.
Şəhidimizin bacısı Yaqut Rəhimova:” Xəyal məndən kiçik idi. Ailəmizdə hamı kimi, mən də onu əzizləyər, onun üçün əlimdən gələn hər şeyi edərdim. Qardaşım hər birimizin sevimlisi idi. Utancaq xasiyyətli, təmiz qəlbli biri kimi hamı tərəfindən sevilərdi. Heç kəslə şəxsi ədavət saxlamaz, kin-küdurəti ürəyinə yaxın buraxmazdı. Qardaşımın hər kəsdən gizli saxladığı, yalnız özünəməxsus, çox maraqlı daxili dünyası vardı.
Xəyal qardaşım da daxil olmaqla, Vətənimiz Azərbaycan uğrunda, xalqımızın azadlığı naminə özünü fəda edən bütün şəhidlərimizə Allah rəhmət etsin! Onların müqəddəs ruhu qarşısında baş əyirəm!”.
Xəyalın bacısı İnarə Rəhimova:”Xəyalın, ürəyimdə istiqanlı qardaş, sədaqətli bir dost kimi xüsusi yeri var. Qardaşım Vətənimizi, xalqımızı bütün vücudu, ruhu ilə sevərdi! Vətən Müharibəsi başlayanda, Xəyalın cəbhəyə getmək üçün necə can atması yaxşı yadımdadır. Qardaşım torpaqlarımızın azadlığı uğrunda gedən qanlı döyüşlər zamanı şəhid olub. Şəhid baçısı olmaq, həm çətin, həm də, olduqca qürurverici bir hissdir. Bu adın məsuliyyətini dərk edir, ağırlığını qəlbimdə daşıyıram. Uca Allah, mənim də qardaşım daxil olmaqla, cəmi şəhidlərimizə rəhmət etsin!”.
Şəhidimizin bacısı Səbinə Rəhimova: ” Xəyalla ən yaxın ünsiyyətdə olan ailə üzvü mən idim. Bizim aramızda heç bir sirr yox idi.
Vətən Müharibəsi başlayanda onu da cəbhəyə çağırdılar. Bizdən fərqli olaraq, o, həmin gün çox sevinirdi. Bizə təsəlli verərək, hər şeyin yaxşı olacağını deyirdi. Cəbhəyə getməzdən əvvəl, evimizə də, mənə də lazım olan zəruri şeyləri aldı. Bizdən arxayın olduqdan sonra, rahat şəkildə yola düşdü…
Qardaşımın cismən olmasa da, ruhən bizimlə olduğunu bilirəm. Xəyal şəhid olan gündən, onunla görüşə, yalnız qəbri üstə gedirəm. Artıq, bu yer, qardaşımla söhbət yerim, ona qarşı olan duyğularımın canlandığı ən müqəddəs bir məkandır.
Bütün şəhid bacıları kimi, mən də qardaşımla fəxr edirəm! Ona, Allahdan rəhmət diləyirəm!”.
Şəhidimizin dayısı Eynullah Əsgərov: «Xəyal evimizdə, elimizdə özünə hörmət qazanmağı bacarmışdı. O, xüsusilə, mənim üçün çox doğma, çox əziz idi. Heç zaman, onu övladlarımdan seçməmişəm. Xəyaldan özümə qarşı həmişə hörmət və ehtiram görmüşəm. Onun cismən yoxluğu məni çox kədərləndirir. Bizim üçün Xəyal, elə öz adı kimi, xəyal olaraq da qaldı!… Xəyalla bərabər, bütün şəhidlərimizlə fəxr edirəm! Allah onlara rəhmət etsin! Müqəddəs ruhları qarşısında baş əyirəm!”.
Xəyalın qohumu Arzu Rəhimov:”Məşhur alman mütəfəkkiri, şair-dramaturq Höte qeyd edib: “Şərəfli yaşamaq mümkün olduğu yerdə, şərəfsiz yaşamaq nahaqdır”!
Bu dünya həyatına fərqli şəkildə, gözəl bir adla “Əlvida” deməkdir şəhid olmaq. Vətən, xalq yolunda öz istəyi ilə, bilərəkdən canını fəda edən insanların fəth etdiyi ən yüksək, ən şərəfli zirvədə dayanmaqdır şəhid olmaq. Bu yol, bizim şahidi olduğumuz savaşların qəhrəmanı olan qorxmaz, məğrur oğullarımızın getdiyi şərəfli bir döyüş yoludur. Onların qısa, lakin hər kəsə nümunə olacaq həyat hekayəsi, özündə şanlı tariximizi əks etdirərək yaşatdı… Cənnət sakinləri olan şəhidlərimizin müqəddəs ruhu qarşısında baş əyir və Ulu Tanrıdan onlara rəhmət diləyirəm!…”
Şəhidimizin döyüş yoldaşı Əmrah Əliyev:” Xəyal ilə eyni gündə, qismən səfərbərlik çağırışı ilə ordu sıralarına çağırılmışıq. Biz, təlim taborunda, döyüş zamanı da bir yerdə olmuşduq. Komandanlıq tərəfindən Xəyala qarşı həmişə yaxşı münasibət olmuşdur. Nizam-intizamlı olduğundan, hamı tərəfindən hörmətlə qarşılanardı.
Xəyal, yaxından tanıdığım, qorxmaz, mərd döyüşçülərdən biri idi. O, Vətəninə ləyaqətlə xidmət etdi, xalqına, dövlətinə sadiqliyini, ona sədaqətini öz əməli işi və sevgisi ilə sübut etdi!”
Qeyd edim ki, Azərbaycan Respublikasının Prezidenti, Ali Baş Komandan İlham Əliyevin 15 dekabr 2020-ci il tarixli sərəncamı ilə Xəyal Rahil oğlu Rəhimli ölümündən sonra “Vətən uğrunda” medalı ilə təltif edilib!
Şəhidimiz Beyləqan rayonu ərazisində yerləşən Cərcis Peyğəmbər ziyarətgahında, xüsusi olaraq şəhidlərimiz üçün ayrılan Şəhidlər Xiyabanında dəfn edilib!
