Ermənistan silahlı qüvvələrinin cəbhəboyu genişmiqyaslı təxribat törətməsinə cavab olaraq 2020-ci il sentyabr ayının 27-də Azərbaycan Ordusu əks-hücum əməliyyatına başladı. 44 gün davam edən “Dəmir yumruq” əməliyyatı nəticəsində təxminən otuzillik işğala son qoyuldu və Azərbaycanın ərazi bütövlüyü bərpa edidi. Bu döyüşlər tarixə işğal olunmuş Qarabağ torpağı uğrunda Vətən Müharibəsi adı ilə düşdü.
Alp.az Vətən müharibəsinin 16-cı gününün xronikasını təqdim edir.
Humanitar atəşkəs rejiminə əməl etməyən Ermənistan silahlı qüvvələrinin bölmələri itirdikləri mövqeləri geri qaytarmaq məqsədilə cəbhənin Ağdərə-Ağdam və Füzuli-Cəbrayıl istiqamətlərində bir neçə dəfə kiçik qruplarla Azərbaycan Ordusunun mövqelərinə basqın etməyə cəhd göstərib.
Həmçinin gün ərzində dəfələrlə Goranboy, Tərtər, Ağcabədi və Ağdam rayonlarının ərazisi Ermənistan silahlı qüvvələri tərəfindən müxtəlif çaplı silahlardan və artilleriya qurğularından atəşə tutulub. Nəticədə Tərtər rayonun 1 nəfər dinc sakini ağır yaralanıb.
Azərbaycan Ordusunun həyata keçirdiyi fəaliyyətlər nəticəsində cəbhənin müxtəlif istiqamətlərində düşmənin xeyli sayda canlı qüvvəsi, 3 ədəd BM-21 “Qrad” YARS, 1 ədəd “Tor-M2KM” ZRK, 1 ədəd ZSU-23-4 “Şilka” özüyeriyən zenit qurğusu, 2 ədəd PDM-2, 3 ədəd 2А36 “Qiasint-B” topu, 1 ədəd KS-19 zenit topu, 1 ədəd D-20 haubitsa topu, 3 ədəd PUA, bir neçə avtomobil texnikası məhv edilib və sıradan çıxarılıb. Həmçinin, Qırmızı Bazar məntəqəsi istiqamətinə endirilən artilleriya zərbəsi nəticəsində 1-ci motoatıcı alayın bir bölüyə qədər canlı qüvvəsi pusquya salınıb, hərəkətdə olan avtomobil texnikası sıradan çıxarılıb. Döyüş əməliyyatları zamanı Ermənistan silahlı qüvvələrinin 5-ci dağatıcı alayının müdafiə sahəsində mövqe tutan şəxsi heyəti məhv edilib, 522-ci alayının şəxsi heyəti avtomobil və zirehli texnikalarını mövqelərdə ataraq qaçıblar. Əsgəran istiqamətində hərəkət edən 4-cü motoatıcı alayın avtomobil texnikası kolonu və Ermənistanın Sisian yaşayış məntəqəsi istiqamətindən işğal olunmuş Azərbaycan ərazilərinə doğru hərəkət edən könüllülərdən ibarət bir qrupu atəş zərbəsi ilə məhv edilib.
Oktyabrın 12-nə keçən gecə Ermənistan-Azərbaycan dövlət sərhədinin Tovuz rayonu istiqamətində düşmənin 2 PUA-sı, saat 10:00 radələrində isə Ağdam rayonu istiqamətində 1 PUA-sı Azərbaycanın hava hücumunda müdafiə bölmələri tərəfindən məhv edilib.
Qeyd edək ki, sentyabrın 27-dən oktyabrın 12-si saat 12:00 qədər olan vaxtadək Ermənistan silahlı qüvvələrinin Azərbaycanın yaşayış məntəqələrini atəşə tutması nəticəsində 41 mülki şəxs həlak olub, 207 nəfər yaralanıb. Habelə, 1185 yaşayış evi, 57 çoxmərtəbili yaşayış binası və 148 mülki obyekt yarasız vəziyyətə düşüb.
