Ukrayna Prezidenti Ofisinin rəhbərinin müşaviri Aleksey Arestoviçin sözlərinə görə, Ukrayna qoşunları dünən bəzi istiqamətlərdə müdafiənin konkret sahələrində vəziyyəti yaxşılaşdıran taktiki əks-hücum əməliyyatları həyata keçirib.
Alp.Az xəbər verir ki, bu barədə onun videomüraciətində deyilir.
“Dünən bəzi istiqamətlərdə qoşunlarımız kiçik taktiki əks-hücum əməliyyatları keçirib ki, bu da müdafiənin konkret sahələrində vəziyyəti yaxşılaşdırıb. Qoşunlarımız həmçinin düşmən qruplaşmalarına güclü raket-artilleriya və hava zərbələri endirib. Gün ərzində ən azı yeddi belə zərbə endirilib” – deyə Arestoviç qeyd edib.
O əlavə edib ki, Ukrayna Silahlı Qüvvələrinin Hərbi Hava Qüvvələri ən azı üç təyyarə, bir helikopter və bir neçə qanadlı raketi vurub.
“Düşmən cavab olaraq strateji təyyarələrdən və “İsgəndər” tipli ballistik raketlərdən Ukrayna ərazisindəki obyektlərə zərbələr endirib. Mülki obyektlərə zərbələr endirilib”, – Prezident Ofisi rəhbərinin müşaviri qeyd edib.
Arestoviç Rusiya ordusunun atdığı raketlərin üçdə-ikisinin mülki hədəfləri vurduğunu bildirib: “Görünür, bu, qəsdən edilir”.
Onun sözlərinə görə, Ukrayna ətrafında ümumi vəziyyət və cəbhə xəttindəki ən qaynar nöqtələr gün ərzində dəyişməyib və buna şansı yoxdur.
“Çünki Rusiya Federasiyası öz resurslarını xərcləyib. Suriya və Liviyadan muzdluları, ordakı qoşunlarının müəyyən hissələrini Uzaq Şərqdən köçürmək cəhdləri hələ baş tutmayıb. Yəni, onların heç bir ehtiyatı yoxdur. Həm bizim qiymətləndirməyə
, həm də aparıcı Qərb ekspertlərinin qiymətləndirməsinə görə”, – Arestoviç qeyd edib.
