Bu gün Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Türkiyənin ölkəmizdəki səfiri Cahid Bağçı ilə görüşüb.
Komitənin mətbuat xidmətindən Alp.az-a daxil olan məlumatda bildirilib ki, səfirə Azərbaycanda qaçqınlar və məcburi köçkünlərlə iş sahəsində həyata keçirilən dövlət siyasəti haqqında məlumat verilib.
Bildirilib ki, Prezident İlham Əliyev məcburi köçkünlərə böyük diqqət və qayğı göstərir, Birinci vitse-prezident xanım Mehriban Əliyeva onların problemlərinin həlli üçün məqsədyönlü iş aparır.
Hazırda məcburi köçkünlərin işğaldan azad edilmiş ərazilərə, uzun illər bundan qabaq didərgin düşdükləri yurdlarına qayıdışına hazırlıq görüldüyü qeyd edilib.
Səfir Cahid Bağçı səmimi qəbula görə təşəkkürünü bildirib. Azərbaycanın öz torpaqlarını işğaldan azad etməsinin bütün türk dünyası üçün əhəmiyyətli olduğunu vurğulayıb. Yeni reallıqlar şəraitində Türkiyə-Azərbaycan əlaqələrinin daha da möhkəmlənməsi üçün çalışacağını deyib.
Görüşdə daimi yaşayış yerlərinə qayıdış ərəfəsində məcburi köçkünlərin təhsil, məşğulluq, peşə hazılığı məsələlərinə qardaş ölkənin dəstəyi və qarşılıqlı maraq doğuran digər məsələlər barədə fikir mübadiləsi aparılıb.
