Fransa çempionatında 2020/2021 mövsümünün qalibi müəyyənləşib.
Lider “Lill” son turda səfərdə “Anje”yə 2:1 hesabı ilə qalib gələrək 83 xalla çempion olub. Komandanın qələbə qollarını Conatan David (10-cu dəqiqə) və Burak Yılmaz (45+1 penaltidən) vurub. Bununla da, “Lill” 10 ildən sonra yenidən Liqa 1-in qalibi olmağı bacarıb. Alp.az xəbər verir ki, çempionluq yarışında “Lill”in türk futbolçuları Burak Yılmaz, Yusuf Yazıcı və Zeki Çelikin xüsusi zəhməti var. Burak Yılmaz komandanın bombardiri olmaqla yanaşı bu sezon Fransada ən yaxşı futbolçu seçilməyə əsas namizəddir.
Çempiondan 1 xal geridə qalan PSJ 2-ci pillə ilə kifayətlənib. “Monako” isə 78 xalla 3-cü olub. Beləliklə, “Lill”, PSJ və “Monako” Fransanı Çempionlar Liqasında təmsil edəcək. 4-cü və 5-ci pillədəki “Lion” və “Marsel” Avropa Liqasında oynamaq hüququ qazanıb. “Renn” isə Konfrans Liqasında çıxış edəcək.
Mövsümü son iki pillədə bitirən “Nim” və “Dijon” elitanı tərk edib. 18-ci yerin sahibi “Nant” isə Liqa1-də qalmaq üçün pley-off oyunu keçirəcək.
Qeyd edək ki, bundan əvvəl son 3 mövsümdə Fransa çempionatının qalibi PSJ olmuşdu.
