Yəmən mediası hadisə şahidlərinə istinadən xəbər verib ki, husi terrorçuları İranın göstərişi ilə Yəmənin paytaxtı tarixi Səna şəhərində yerləşən türk şəhidlərinin abidəsini dağıtmağa cəhd ediblər.
Alp.az xəbər verir ki, bu barədə dünən Türkiyə Xarici İşlər Nazirliyinin yaydığı bəyanatda bildirilib.
Bəyanatda deyilir: “Bu gün husi ünsürlərinin Səna şəhərində yerləşən Türkiyə şəhidlərinin xatirəsinə qoyulmuş abidəyə hücumunu kəskin şəkildə qınayırıq”.
“Yəmənlə ortaq tariximizin və keçmişə dayanan münasibətlərimizin simvolu olan türklərin Yəməndəki varlığına hörmətsizlik tamamilə qəbuledilməzdir. Şəhidlər abidəsinə dəymiş ziyanın aradan qaldırılmasını və günahkarların tezliklə cəzalandırılmasını gözləyirik”,-deyə bəyanatda habelə vurğulanıb.
Qeyd edək ki, sosial şəbəkələrdə yayılan videodan görünür ki, yaraqlıların müşayiət etdiyi buldozer Türkiyə şəhidlərinin xatirəsinə ucaldılmış abidəni dağıtmağa çalışır.
