Tanınmış jurnalist Tural Səfərov Moderator.az İnformasiya Agentliyinin baş redaktoru təyin olunub. Bu barədə Agentliyin təsisçisi Zülfüqar Hüseynzadə açıqlama verib.
“Tural bəy may ayının 1-dən rəsmən agentliyin baş redaktoru kimi fəaliyyətə başlayacaq. O, Vətəninə, dövlətçiliyə bağlı insan, savadlı kadr, peşəkar jurnalistdir. Tural Səfərovun Moderator.az ailəsinin gücünə güc qatacağına inanırıq”, deyə Zülfüqar Hüseynzadə bildirib.
Qeyd edək ki, Tural Səfərov əmək fəaliyyətinə 2003-cü ildə Naxçıvan Muxtar Respublikası Dövlət Televiziya və Radio Verilişləri Komitəsinin İctima-siyasi verilişlər redaksiyasının redaktoru kimi başlayıb.
2005-ci ilin dekabr ayından 2008-ci ilin fevral ayınadək Naxçıvan Muxtar Respublikası Dövlət Televiziya və Radio Verilişləri Komitəsinin Proqram-Buraxılış və Əlaqələndirmə Direksiyasının direktoru vəzifəsində çalışıb.
2008-ci ildə Naxçıvan Muxtar Respublikası Ali Məclisi Aparatının Mətbuat və ictimaiyyətlə əlaqələr şöbəsinin baş məsləhətçisi təyin olunub, 2011-ci ilədək həmin vəzifədə çalışıb.
2011-2017-ci illərdə Naxçıvan Muxtar Respublikası Ali Məclisinin və Nazirlər Kabinetinin rəsmi orqanı olan “Şərq qapısı” qəzetinin baş redaktoru olub.
2017-ci ilin avqust ayından ilin sonunadək “Moderator.az” İnformasiya Agentliyinin baş redaktor müavini işləyib.
2018-ci ilin aprel ayında “Azərxalça” Açıq Səhmdar Cəmiyyətinin mətbuat katibi vəzifəsinə təyin olunub. 2020-ci ilin oktyabr ayından son təyinatadək Səhmdar Cəmiyyətin İdarə Heyəti sədrinin müşaviri vəzifəsində çalışıb.
Siyasi-analitik və publisistik yazılarla mətbuatda müntəzəm çıxış edir, dövlət qulluğunun kiçik müşaviridir.
