“İşğaldan azad edilən torpaqlara gedəndə neçə illərdir necə əraziləri itirdiyimizi anladım.
Belə gözəl yerlər, dağlar, çaylar, bağlar 30 il ermənilərin ayaqları altında tapdalanıb”.
Bu sözləri jurnalistlərə açıqlamasında Qafqaz Müsəlmanları İdarəsinin sədri, şeyxülislam Allahşükür Paşazadə “Təzəpir” məscidində qılınan bayram namazından sonra çıxışında deyib. O bildirib ki, Şuşaya getdiyində də küçələri dağıtdıqlarını görüb:
“Dövlətimiz və xalqımız torpaqlarımızı bərpa edəcək. Çünki orada bizim şəhidlərimizin ruhu, qanı var. Bu qalibiyyət xalqındır, xalqın oğullarınındır. Dualarını etdiyimiz Qarabağ torpaqları azaddır”.
Allahşükür Paşazadə onu da qeyd edib ki, qələbəyə çatmağımızda Türkiyə və İranın böyük zəhməti var:
“Mən bunu bilirəm, hamısını açıqlamaq istəmirəm. Əgər bu gün bizim qonşularımız, arxamız bərk olmasaydı, qələbəmiz bəlkə də olmazdı. Odur ki, Türkiyə Prezidenti Rəcəb Tayyib Ərdoğan cənablarına və Ayətullah Xameneyi həzrətlərinə müsəlmanlar adından təşəkkürümü bildirirəm. Ayətullah Xameneyinin “Qarabağ torpağı İslam torpağıdır” deyərək fətva verməsi qələbənin carçısı idi və bizi qələbəyə apardı”.
Şeyxin İranla bağlı dedikləri cəmiyyətdə birmənalı qarşılanmayıb. İranın Ermənistanın havadarı kimi çıxış etməsi hələ yaddaşlardadır.
Cebhe.info-ya açıqlamasında politoloq Cümşüd Nuriyev bildirib ki, həm Hacı Allahşükür Paşazadə, həm də Ocaq Nejad siyasət adamı yox, din adamıdır:
”Ocaq Nejad niyə 8 ay sonra Şuşaya getdi? 44 gün müharibə vaxtı hər hansı bir bəyanat da vermədi. İndi də ümumiyyətlə, bəyanat verməsi düz deyildi. Həm Hacı Allahşükür Paşazadə, həm də Ocaq Nejad siyasət adamı deyil. Hər ikisi din adamıdır. İran İslam Respublikasıdır və İranı dini müstəvidən siyasi müstəviyə daşımaq yanlış yanaşmadır.
Hər iki çıxışı sırf dini baxımdan dəyərləndirmək lazımdır. Şeyx çalışdı ki, İran-Azərbaycan münasibətlərini yaxşılaşdırsın, amma istədiyi kimi alınmadı. Etiraf etmək lazımdır ki, həmişəki kimi alınmadı. İranın dini liderinin o sözünü istifadə etmək ümumiyyətlə, düzgün deyil. Bu bəyanat nə dini, nə də siyasi müstəvidə düzgündür. Əgər o desəydi ki, Qarabağ Azərbaycan torpağıdır, o zaman qəbul edərdik”.
Politoloq İran nömrə nişanlı maşınların Ermənistan ərazisindən Qarabağa daxil olduğunu vurğulayıb:
“Əvvəla, humanitar yardım gətirmək məsələsidirsə, niyə Azərbaycandan icazə alınmır? Elə gəlsin Ağdamdan keçsin getsin Xankəndinə, niyə bu qədər yol uzadırlar? Bu, həm Azərbaycan dövlətçiliyinə, həm də İslam dininə hörmətsizlikdir. Bu günə qədər də İranın dini liderlərindən dövlət başçılarına qədər heç biri rəsmi şəkildə Qarabağın Azərbaycan torpağı olduğunu, Xocalı soyqırımını qəbul etməyib.
Peyğəmbərimiz deyib ki, müsəlman müsəlmanın qardaşıdır. Əgər ermənilər farsın din qardaşı olan türkü qırırlarsa, fars buna heç bir münasibət bildirmirsə, o, bizim qardaşımız ola bilər? Kim mənə xəyanət edirsə onun hansı dinə mənsub olması önəmli deyil.
Bütün bunlar baş verəndə İran harada idi? Bir şeyi bilirəm ki, İran Azərbaycanın daxili işinə nə vaxt qarışsa, bəlaya düşmüşük. Bütün hallarda nə İranın dini fətvası, nə də siyasi bəyanatı bizə lazımdır”.
