44 Vətən Müharibəsində dastan yazan oğullarımızdan biri də şəhid Əlizamin Həmid oğlu İsgəndərovdur. Əlizamin İsgəndərov 6 dekabr 1977-ci ildə Beyləqan rayonunun Milabad qəsəbəsində anadan olub.
1984-1996-cı illərdə Milabad qəsəbəsi tam orta məktəbində təhsil alıb. Güləş idman növü ilə məşğul olub. Bir çox yarışların qalibi olan Əlizamin həyatını hərb sənətinə bağlayıb.
Əlizamin İsgəndərov 1996-1999-cu illərdə Azərbaycan Silahlı Qüvvələrinin sıralarında müddətli həqiqi hərbi xidmətdə olub. Hərbi xidməti zamanı müdafiə naziri Səfər Əbiyevin mühafizə xidmətinin üzvü olub. 2006-cı ildən isə müddətdən artıq həqiqi hərbi xidmət qulluqçusu idi və Azərbaycan Silahlı Qüvvələrinin “N” saylı hərbi hissəsində rabitəçi olaraq xidmət edirdi. 2016-cı ildən müqavilə əsasında Kəşfiyyat Manqasının Komandiri idi.
Azərbaycan Ordusunun çavuşu olan Əlizamin İsgəndərov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Xüsusi Təyinatlı Qüvvələrin tərkibində Hadrut qəsəbəsinin, Füzulinin, Qubadlının və Şuşanın azadlığı uğrunda gedən döyüşlərdə savaşıb. Bu döyüşlər zamanı 3 dəfə yaralansa da geri qayıtmayıb. Əlizamin İsgəndərov noyabrın 5-də Şuşa döyüşləri zamanı Daşaltı istiqamətində şəhid olub. Beyləqan rayonunun Milabad qəsəbəsində dəfn olunub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamı ilə
“Vətən uğrunda” medalı,”Qubadlının azad olunmasına görə” medalı ,
“Füzulinin azad olunmasına görə” medalı,”Xocavəndin azad olunmasına görə” medalı,”Şuşanın azad olunmasına görə” medalı , “Cəsur döyüşçü” medalı ilə təltif edilib.
Şəhidin övladları ATV kanalında yayımlanan “Bizimləsən” verilişində qonaq olub, ataları ilə bağlı xatirələrini bölüşüblər.
Qoşqar Salmanlı
