Türkiyədə meşə yanğınlarının söndürülməsinə cəlb olunmuş Rusiya Be-200 amfibiya-təyyarəsinin qəzaya uğraması nəticəsində həlak olan heyət üzvlərindən biri əfsanəvi rusiyalı təyyarəçi Yevgeni Kuznetsovdur. Alp.az xəbər verir ki, Kuznetsovun həlak olmasını onun barəsində sənədli filmin rejissoru Natalya Qaquyeva təsdiqləyib. “Bəli, o həlak olub. Yaxınları da bunu təsdiqləyir”,-Qaquyeva bildirib.
Yevgeni Kuznetsov 1987-ci ildə V.P.Çkalov adına Borisoqlebsk ali aviasiya məktəbini bitirib. Məktəbi bitirdikdən sonra Sakit okean donanmasının aviasiyasında qulluq etməyə başlayıb. Dəniz aviasiyası pilotlarının yetişdirilməsində iştirak edib. Rusiya Müdafiə Nazirliyinin saytında göstərilir ki, polkovnik Kuznetsov daha sonra Şimal donanmasının dəniz aviasiyasının əlahiddə qırıcı aviasiya polkunun komandiri olub.
Kuznestov daha sonra mülki aviasiyaya keçib və Be-200 amfibiya-təyyarəsinin Arktika buzlaqlarında sınaqlarını keçirənlərdən biri olub. Ququyeva bildirir ki, təyyarəçi Be-200 amfibiya-təyyarələrinin sınaqları üzrə əsas mütəxəssis idi. O, Arktika şərtlərində uçuşlar həyata keçirib və Frans-İosif torpağında təyyarəni endirib.
Hərbi ekspert Dmitri Boltenkov “İzvestiya” qəzetinə bildirib ki, Türkiyədəki qəzada çox yüksək peşəkarlığa malik təyyarəçilər həlak olublar. Çünki öz-özlüyündə təyyarəni suyun səthinə endirə bilmək yüksək peşəkarlıq tələb edir.
Xatırladaq ki, qəzaya uğrayan Rusiya təyyarəsi iyulun 28-də meşə yanğınları ilə mübarizə üçün Türkiyəyə göndərilmişdi. Təyyarə ötən gün avqustun 14-də Adanada, dağlıq ərazidə qəzaya uğrayıb. Nəticədə beş rusiyalı heyət üzvü və üç türkiyəli fövqəladə hallar əməkdaşı həlak olub. Qəza nəticəsində təyyarə alovlanıb və tamamilə yanıb. Hava gəmisindən geriyə ancaq tüstülənən qalıqlar və quyruq hissəsi qalıb.
Qəzanın səbəblərinin araşdırılması üçün komissiya yaradılıb. Bildirilir ki, qəzaya uğrayan təyyarə olduqca etibarlı idi və 20 ilə yaxındır istismar olunsa da bir dəfə də qəza vəziyyəti ilə üzləşməmişdi.
