1979-cu il avqustun 1-də Moskvanın Böyük teatrı ABŞ-da qastrollara başladı. Truppanın tərkibinə məşhur ər-arvad balet ustaları – Aleksandr Qodunov və Lyudmila Vlasova daxil idilər. Səfərin əvvəlində Qodunov arvadı ilə Amerikada qalmaqdan söz açır. Lyudmila isə SSRİ-də tənha anasının olması səbəbindən bunu etməyəcəyini bildirir. Nyu-Yorkda olarkən Qodunov avqustun 21-də Amerika hakimiyyətin orqanarına müraciət edərək ABŞ-da qalmaq istədiyini bildirir. Onun bu addımından sovet tərəfi avqustun 23-də xəbər tutur və dərhal Lyudmila Vlasovanı qaldığı oteldən çıxararaq sovet konsulluğuna aparırlar. Arvadı ilə söhbətlərdə rədd cavabı almasına baxmayaraq Qodunov amerikalılara Lyudmilanın da qalmaq istədiyini söyləyir. Buna görə də sovetlər avqustun 24-də Vlasovanı Moskvaya göndərmək istəyəndə amerikalılar təyyarənin uçuşuna icazə vermirlər.
Təyyarəyə keçən Amerika məmurları aktrisadan ölkədə qalmaq istəyib-istəmədiyini soruşurlar və rədd cavabı alırlar. Buna baxmayaraq, onlar Lyudmilanın təhdid altında ola biləcəyini istisna etmirlər və sovet təyyarəsindən çıxıb başqa yerdə danışdırmaq istədiklərini deyirlər. Buna sovet tərəfi razı olmur. Amerikalılar günün sonunda təyyarənin qapısına birləşdiriləcək səyyar salonda danışmağı təklif edirlər, amma bu da ruslar tərəfindən rədd edilir. Belə olduqda, təyyarənin uçuşuna icazə verilmir.
Üç gün çəkən böhrandan sonra avqustun 27-də ruslar amerikalıların təklifi ilə razılaşmalı olurlar. Səyyar salonda hər iki ölkəni 6 nəfər təmsil edir və onlara ABŞ və SSRİ-nin BMT-dəki nümayəndələrinin müavinləri rəhbərlik edirdi. Vlasova yenə Moskvaya könüllü qayıtdığını bildirir. Bundan sonra təyyarənin uçuşuna icazə verilir.
İnsidentə baxmayaraq, Böyük teatrın turnesi davam edir. Aleksand Qodunovun rolları Leonid Kozlova həvalə edilir. Teatr Nyu-Yorkdan sonra Çikaqoda və Los-Ancelesdə çıxış edir. Sentyabrın 17-də SSRİ qayıtmaq üçün hava limanında toplaşanda məlum olur ki, Leonid Kozlov və arvadı Veronika da ABŞ-da qalmaq üçün müraciət ediblər. Beləcə, Amerikaya Böyük teatr getdi, qayıdanda bir qədər balacalaşmışdı.
Hadisələr əsasında 1985-ci ildə SSRİ-də “Reys 222” adlı film çəkildi , əlbəttə film Kozlovların qalmasını əhatə etmirdi.
Qodunov 1985-ci ildə baletdən gedərək aktyorluqla məşğul oldu. Onun ifa etdiyi rollar arasında “Məğlubedilməz” filmində terroçu Karlı da var. O, 1995-ci ildə 46 yaşında vəfat etdi, ölüm səbəbi kimi hepatit ola-ola spirtli içkilər qəbul etməsi göstərildi. Ərindən 7 yaş böyük olan Lyudmila Vlasova hələ həyatdadır.
Yadigar Sadıqlı
