“Son bir neçə həftədə Liviyadan Kremlin dəstəklədiyi “Vaqner” özəl hərbi şirkətinin 200-dək rusiyalı döyüşçüsü və minədək suriyalı çıxarılıb”.
Alp.az xəbər verir ki, bu barədə məlumatı “Financial Times” qəzeti Qərb və Liviya rəsmilərinə istinadla yayıb.
Məqalədə qeyd olunur ki, Moskva Liviyada hazırda 5 minədək muzdlu döyüşçü saxlamaqda davam edir. Liviyanın aparıcı rəsmisi də Rusiyanın bu ölkədən muzdlularını çıxardığını deyib, amma rəqəm açıqlamayıb.
“Son illər Rusiya Afrikanın şimalında və qərbində bəzi ölkələrə muzdlular göndərməklə qitədə möhkəmlənməyə çalışır. Mərkəzi Afrika Respublikası (MAR), Mali kimi ölkələrdə Kreml keçmiş müstəmləkəçi Fransaya qarşı genişmiqyaslı hiddətdən yararlanaraq öz nüfuzunu gücləndirir”, – “Financial Times” yazır.
Artıq MAR-dan da 200-dək “Vaqner” döyüşçüsünün çıxarıldığı bildirilir. İki Qərb rəsmisinin sözlərinə görə, Rusiyanın başlanğıcda Liviyadan qüvvə çıxarmaq niyyəti olmayıb, amma Ukraynada böyük irəliləyiş əldə etmədiyindən belə bir qərar verilib. Britaniyanın Müdafiə Nazirliyi də martın sonunda deyirdi ki, Rusiya Afrika və Suriyadakı əməliyyatlar hesabına “Vaqner” qüvvələrini Ukraynaya göndərməyə məcbur qalır”.
“Financial Times” yazır ki, Vaqner döyüşçülərindən fərqli olaraq suriyalıların Ukraynaya göndərildiyi bəlli deyil. İndiyədək Kiyev rəsmiləri rusiyalı əsgərlərlə yanaşı suriyalıların da döyüşdüyünü bildiriblər. Qəzetin danışdığı Qərb rəsmiləri isə həmin suriyalıların Ukraynaya göndərilməsinə rair dəlil olmadığını bildirib.
Türkiyə bir ay qabaq hava məkanını Liviya və Suriyadan Rusiya hərbi uçuşları üçün bağlayıb. Bu addım Ukraynaya döyüşçü və avadanlıq daşınması ehtimalına görə atılıb.”AzPolitika.info”
