Canni de Byazi DÇ-2022-nin seçmə mərhələ oyunlarından sonra Azərbaycan millisini tərk edəcək.
Alp.az saytının məlumatına görə, bu barədə iddianı İrlandiya mətbuatı ortaya atıb.
Seçmə mərhələ çərçivəsində bu gün üz-üzə gələcəkləri Azərbaycan yığmasını dəyərləndirən irlandlar italiyalı mütəxəssisin bu ilin sonunda yola salınacağını yazıb. Buna səbəb kimi isə de Byazinin Albaniya yığmasından fərqli, Azərbaycan millisində uğursuzluğa düçar olması göstərilib: “İtaliyalı çalışdırıcı Albaniya xalqının ona bəxş etdiyi sevgini Azərbaycanda görmədən oranı tərk edəcək. Çünki artıq səbirləri tükənməkdədir”.
İrlandiya mətbuatı iddia edir ki, AFFA prezidenti Rövnəq Abdullayev Canni de Byazinin qarşısına şərt qoyub.”Canni de Byazi millidə qalmaq istəyirsə son iki oyundan 4 xal toplamalıdır.” İrlandiya mətbuatı isə Canni de Byazinin bunu bacaracağına ümid etmir.
Qeyd edək ki, seçmə mərhələnin ilk 3 oyunundan sonra xal üzünə həsrət qalan millimiz bu gün İrlandiya ilə səfərdə, sentyabrın 7-də isə Portuqaliya ilə evdə qarşılaşacaq.
