Türkiyədə Cövhər Dudayevin adına parkın açılması və ona heykəl qoyulması Çeçenistan rəhbərini bərk qəzəbləndirib
Türkiyənin Körfəz şəhərində İçkeriya Çeçen Respublikasının ilk prezidenti Cövhər Dudayevin adına parkın açılması və ona heykəl qoyulması Çeçenistan rəhbəri Ramzan Kadırovu özündən çıxarıb.
“Türkiyə hakimiyyətinin Rusiyada cinayətlər törətmiş şəxslərin adlarının əbədiləşdirilməsinə yönələn hərəkətləri Moskva və Ankara arasında münasibətlərə neqativ təsir edə bilər”, – deyə Kadırov özünün Teleqram-kanalında bəyan edib. Onun sözlərinə görə, “belə hərəkətlər son dərəcə riyakar təsir bağışlayır və Türkiyənin Rusiyaya münasibətdə dost dövlət obrazına uyğun deyil”.
Çeçenistan rəhbəri Türkiyə hakimiyyətini analoji cavabla hədələyib. “Məsələn, belə olan halda Qroznıda Kürd Fəhlə Partiyasının banisi, Türkiyə həbsxanalarının birində ömürlük həbs cəzasını çəkən Abdulla Öcalanın adını əbədiləşdirmək tamamilə məntiqli və bizim tərəfimizdən siyasi cəhətdən adekvat olardı”, – o qeyd edib.
Bundan başqa, Kadırov Rusiya XİN-i yaranmış vəziyyətə xüsusi diqqət yetirməyə və belə təzahürlərə qarşı qabaqlayıcı diplomatik tədbirlər görməyə çağırıb. Rusiya XİN də Türkiyə tərəfinin hərəkətlərini tənqid edərək xatırladıb ki, “Moskvanın terrorçulara heykəllərin qoyulması məsələsinə münasibəti dəyişməz və prinsipial olaraq qalmaqdadır”. Bu barədə “RİA Novosti” agentliyi bildirib.
Qeyd edək ki, Cövhər Dudayev 1991-ci ildə Çeçen-İnquş Respublikasının prezidenti seçilib. Rusiyanın xüsusi xidmət orqanları bir neçə dəfə ona qarşı sui-qəsd təşkil edib. Növbəti belə sui-qəsd 1996-cı ildə onun həlak olması ilə nəticələnib. Onun ailəsi müəyyən müddət Bakıda da qalıb.
“Atlas” Araşdırmalar Mərkəzinin rəhbəri Elxan Şahinoğlu məsələyə yanaşmanın özünü səhv sayır: “Cövhər Dudayevlə Abdullah Öcalanın eyniləşdirilməsi qədər yanlış yanaşma ola bilməz. Abdullah Öcalan terrorçudur, uşaq qatilidir. Ramzan Kadırov Türkiyəyə qarşı birincə dəfə deyil ki, dil uzadır. O unudur ki, Çeçenistanda iki müharibə baş verərkən, bir çox çeçen ölümdən və bombardmanlardan məhz Türkiyədə sığınacaq almışdı. Türkiyəni ikinci vətən sayan çeçenlərin sayı az deyil. Ramzan Kadırov ondan danışsın ki, İstanbulda keçmiş çeçen döyüşçüləri öldürmək məqsədilə ora killer göndərən və bunu əmr verən özü böyük cinayət törədib. Onun Dudayevə qoyulan heykəllə bağlı etirazı var idisə, bunu diplomatik kanallarla Ankaraya bildirməsi mümkün idi, yoxsa “biz də Öcalana heykəl qoyarıq” deməklə məsələ həll olunmayacaq və vəziyyət daha da qəlizləşəcək. Cövhər Dudayev sıradan biri olmayıb. O, SSRİ-nin generalı olan tək çeçen olub. Xalq ona inanaraq 1991-ci ildə Dudayevi prezident seçib. Çeçenlər bizim də qardaşlarımızdır. Azərbaycan müharibənin dəhşətlərindən qaçan çeçenlərə sığınacaq verib. Şeyx Şamil bizim də qəhrəmanımızdır və mən hesab edirəm ki, bu tarixi şəxsiyyətin heykəli Zaqatala ilə yanaşı Qarabağda da qoyulmalıdır”.
AĞ Partiya başqanının I müavini, siyasi şərhçi Əhəd Məmmədli kimə heykəl qoymaq məsələsinin Türkiyənin özəl haqqı olduğunu söylədi: “Kadırovun kimliyi məlumdur. Onun təhdidlərinə gəlincə, nə qədər istəyirsə, heykəl qoysun. Fikrimcə, bu, Türkiyənin özəl haqqıdır. Özü bilər, kimin heykəlini qoyur, kimin adına küçə salır. PKK-nın qurucularından biri Rusiyadır. Moskva Arayiki generalları ilə görüşdürə, yaxud tərəf müqabili edə, terrorçulara dəstək verə bilər? Yaxud da Rusiya Azərbaycanın icazəsi olmadan Fransa prezidentliyinə namizədin Xankəndinə səfərini təşkil edə bilər? Türkiyə və Azərbaycan hansısa addımlar atanda, dərhal bunu etirazla qəbul edir. Hər iki qardaş ölkə Rusiyanın danışdığı dillə elə onunla danışmalıdır. Çox istərdim ki, qardaş Türkiyə XIX əsrdə rus işğalına qarşı çeçen xalqının başında duran və sona qədər təslim olmadan vuruşan, şəhid olan Şeyx Mənsurun şərəfinə onun adı İstanbul, yaxud Moskvada küçələrdən birinə verilsin. Polşanın paytaxtı Varşavada Cövhər Dudayevin adına küçə var. Nə əcəbsə, bu ölkəyə qarşı o hədə-qorxular gəlinmir. Amma qardaş dövlət nəsə edəndə ayılıb, danışmağa başlayırlar”.“Yeni Müsavat”
