Ermənilərin Gəncədə törətdiyi ilk terrordan 1 il ötür. Hərbi ekspert Ramil Məmmədlinin sözlərinə görə, Gəncə terrorunda məqsəd ordumuzun irəliləyişin qarşısını almaq idi.
Xatırladaq ki, 2020-ci ilin oktyabrın 4-də səhər saat 10 radələrində erməni hərbçilərin raket atəşi nəticəsində Azərbaycanın ikinci ən böyük şəhərində bir nəfər şəhid olub, 32 mülki şəxs yaralanıb.
Yenisabah.az-a açıqlamasında Ramil Məmmədli qeyd edib ki, Azərbaycan silahlı qüvvələri həmin günlərdə, yəni sentyabrın 27-dən başlayaraq əks-hücum əməliyyatları ilə bir-birinin işğalda olan əraziləri geri qaytarırdı.
“Ermənistan ordusunun birinci müdafiə xəttini, həmçinin dərinlikdə olan müdafiə xəttini və dayaq məntəqələrini darmadağın edərək sıradan çıxardan ordumuz bütün istiqamətlərdə uğur qazanırdı. Belə bir şəraitdə döyüş meydanından, cəbhə xəttindən uzaqlıqda olan Gəncəyə “Elbrus” raketləri ilə zərbə endirilib. Bu Azərbaycan ordusunun irəliləməsinin qarşısını almaq və əhali aarasında çaxnaşma yaratmaq məqsədi daşıyırdı. Lakin düşmən buna nail ola bilmədi”.
Ekspertin sözlərinə görə, Gəncənin bombalanması hərbi cinayətdir:
“Beynəlxalq aləmdə Cenevrə və Haaqa konvensiyaları mövcuddur. Fikrimcə, hər iki konvensiyanın tələbləri pozulub. Gəncə, Tərtər, Bərdə və digər dinc sakinlərin yaşadığı digər ərazilərə zərbələrin endirilməsi Haaqa Tribunalında araşdırılmalı və canilər mühakimə olunmalıdır. Çox təəssüf ki, Avropada bəzi məhkəmə istansiayaları məsələyə siyasi baxış nümayiş etdirirlər”.
Ramil Məmmədli qeyd edib ki, ən yaxşı hal yeni bir məhkəmə instansiyasının qurulmasıdır:
“Ayrı bir məhkəmə prosesi qurula, buna hüquqi qiymət verilə bilər. Məsələn, Minsk qrupu çərçivəsində. Çünki belə məsələlər heç də sona qədər ədalətli qərarın tapa bilmir. Gəncənin bombalanması kimi hadisələrin qarşısını almağın yeganə yolu Azərbaycan ordusunun daha da güclənməsidir. Bununla yanaşı, Ermənistan üzərində dominantlığımızı daha da gücləndirərək öz təhlükəsizliyimizi təmin edə bilərik”.
