Alp.az xəbər verir ki, mövzu ilə bağlı açıqlama verən Tofiq Zülfüqarov sosial şəbəkə hesabında paylaşdığı fikirləri belə şərh edib:
“Rusiya hərbi qüvvələrin Suriyadan çıxarılmasının səbəbi Ukrayna-Rusiya arasındakı müharibə ilə bağlıdır. Belə ki, Rusiyaya qarşı tətbiq edilən sanksiyalar və yaşanan böhran Kremlin gəlirlərinə ciddi təsir edib. Bu səbəbdən də, təkcə Suriyada deyil, eləcə də digər bölgələrdəki rus hərbi bazaları ləğv oluna bilər. Eyni zamanda Rusiya hərbçilərinin Qarabağdakı hərbi bazasının fəaliyyətinin də yaxın gələcəkdə dayandırılması mümkündür. Çünki, bu hərbi bazanın fəaliyyəti sıfıra bərabərdir. İran və Türkiyə qoşunları qarşısında Rusiyanın Ermənistandakı hərbçiləri çox kiçikdir və heç nə edə bilməz”.
Tofiq Zülfüqarov əlavə edib ki, Qarabağdan həmçinin Rusiya sülhməramlılarının da çıxarılması mümkündür. Çünki onların təminatı birbaşa havadan həyata keçirilir. Bu isə Rusiya üçün xeyli məsrəfə başa gəlir. İndiki şəraitdə isə Rusiyanın buna imkanı yoxdur. Üstəlik Qarabağda Rusiya ilə yanaşı, Türkiyənin monitorinq qrupu da fəaliyyətdədir. Kreml üçün Cənubi Qafqazda Qərbə meydan açmaqdansa, münasibətlərinin yaxşı olduğu Türkiyəyə imkan tanımaq daha məqbuldur. Ona görə də, Rusiya sülhməramlılarını Türkiyə hərbi qüvvələrinin əvəzləməsi mümkündür. Odur ki, müharibə fonunda Rusiyanın gəlirlərinin azalması, Kremli əlavə xərclərdən azad olmağa məcbur edir”.Konkret.az
