“ABŞ Ukrayna Silahlı Qüvvələrinə kəşfiyyat məlumatı verib, onlar bundan Rusiya ordusunun yüksək rütbəli zabitlərini məhv etmək üçün istifadə ediblər”.
Alp.az xəbər verir ki, bu barədə “The New York Times” ABŞ Administrasiyasının yüksək vəzifəli rəsmilərinə istinadən məlumat yayıb.
Mənbələr bildiriblər ki, Ukrayna rəsmiləri yüksək rütbəli Rusiya hərbçilərinin ölümü ilə nəticələnən zərbələr həyata keçirmək üçün Birləşmiş Ştatlardan əldə etdikləri bir sıra məlumat və koordinatları, o cümlədən öz məlumatlarını birləşdiriblər.
Ukrayna rəsmiləri cəbhə xəttində təxminən 12 generalı öldürdüklərini bildiriblər ki, bu da hərbi analitikləri heyrətə salıb.
Məqsədli yardım Bayden administrasiyasının Ukraynaya real vaxt rejimində döyüş sahəsinə dair kəşfiyyat məlumatı təqdim etmək üçün gizli səylərinin bir hissəsidir. Rəsmilər bildiriblər ki, bu kəşfiyyat həmçinin Moskvanın Ukraynanın şərqindəki Donbas bölgəsində döyüşlər üçün gizli döyüş planına dair Amerikanın son qiymətləndirmələrindən əldə edilən gözlənilən Rusiya qoşunlarının hərəkətlərini də əhatə edir. Rəsmilər ABŞ-ın yardımı nəticəsində neçə generalın öldürüldüyünü dəqiqləşdirməkdən imtina ediblər.
Birləşmiş Ştatlar Rusiya ordusunun tez-tez köçürülən mobil qərargahının yeri və digər təfərrüatlarını təqdim etməyə diqqət yetirib. Ukrayna rəsmiləri artilleriya zərbələri və rus zabitlərinin ölümünə səbəb olan digər hücumlar üçün Ukrayna hərbçilərini yüksək rütbəli rus zabitlərinin olması barədə xəbərdar edən ələ keçirilmiş rabitə də daxil olmaqla, həmin coğrafi məlumatı öz kəşfiyyatı ilə birləşdirib.
Kəşfiyyat məlumatlarının bölüşdürülməsi ABŞ-a daha ağır silahlar və on milyardlarla yardımı əhatə edən gücləndirilmiş yardım axınının bir hissəsidir.
ABŞ kəşfiyyatının ukraynalılara verdiyi dəstək döyüş meydanında həlledici təsir göstərərək, Ukrayna ordusunun müəyyən etdiyi hədəfləri təsdiqləyib və onu yeni hədəflərə yönəldib.
Məqalə üçün müsahibə verən rəsmilər Ukrayna ilə paylaşılan məxfi kəşfiyyat məlumatlarının təfərrüatlarını müzakirə etmək üçün anonimlik şərti ilə danışıblar. Administrasiya bunun gərginlik kimi qiymətləndiriləcəyindən və Rusiya Prezidenti Vladimir Putini daha geniş müharibəyə təhrik edəcəyindən ehtiyat edərək, döyüş meydanındakı kəşfiyyat məlumatlarının çoxunu gizli saxlamağa çalışıb. Amerika rəsmiləri eyni zamanda təhlükəni nəzərə alaraq, Rusiya qoşunlarının qərargahı haqqında məlumatı necə əldə etdiklərini təsvir etməyəcəklər. Lakin müharibə boyu ABŞ kəşfiyyat orqanları Rusiya qoşunlarının hərəkətini izləmək üçün müxtəlif mənbələrdən, o cümlədən məxfi və kommersiya peyklərindən istifadə ediblər.
Kəşfiyyat məlumatlarının ukraynalılara təqdim edilməsi ilə bağlı suala cavab olaraq Pentaqonun sözçüsü Con Kirbi bildirib ki, “Biz bu məlumatın təfərrüatlarını danışmayacağıq”. Lakin o etiraf edib ki, Birləşmiş Ştatlar “Ukraynaya özlərini müdafiə etmək üçün istifadə edə biləcəkləri kəşfiyyat məlumatı verir”.
Bu məqalə dərc edildikdən sonra Milli Təhlükəsizlik Şurasının sözçüsü Adrian Uotson verdiyi açıqlamada döyüş sahəsi kəşfiyyat məlumatlarının “rus generallarını öldürmək niyyəti ilə” ukraynalılara verilmədiyini söyləyib.
Məlumata görə, Ukrayna hərbçiləri kəşfiyyat məlumatları əsasında general Valeri Gerasimovun səfər etdiyi yerə zərbələr endiriblər. Lakin rəsmilər etiraf edirlər ki, Amerika kəşfiyyatı digər generalların ölümündə kritik rol oynayıb. “Birləşmiş Ştatlar müntəzəm olaraq Rusiya qoşunlarının və texnikasının hərəkəti haqqında məlumat verir və Ukraynaya kritik hədəflərin yerini təsdiqləməyə kömək edir. Digər NATO müttəfiqləri də Ukrayna ordusuna real vaxt rejimində kəşfiyyat məlumatları verir” – məlumatda deyilir.Publika
