Rusiya prezidenti Vladimir Putin Dmitri Şuqayevin rəhbərliyi altında sanksiyalarla mübarizə üçün operativ qərargah yaradıb. Alp.az Rusiya mediasına istinadən xəbər verir ki, qərargah Hərbi-Texniki Əməkdaşlıq üzrə Federal Xidmətində (FSMTC) sanksiyalarla mübarizə üçün yaradılıb. Bu barədə xidmətin direktor müavini Mixail Babiç bildirib.
“Hazırda yaşadığımız sanksiya dalğası ən sistemli və ən dərindir. Biz onların müdafiə sənayesi və Müdafiə Nazirliyinin birgə fəaliyyətinin hansı sahələrinə təsir edəcəyini təhlil edirik. Bununla əlaqədar olaraq Müdafiə Nazirliyində operativ qərargah təşkil edilib və direktoru Dmitri Şuqayevin rəhbərliyi altında fəaliyyət göstərəcək”, – M. Babiç Dövlət Dumasında ekspert şurasının iclasında bildirib.
Onun sözlərinə görə, bu qərargah müntəzəm olaraq hərbi-texniki əməkdaşlıq subyektləri tərəfindən qaldırılan məsələləri təhlil edir. “Bundan başqa, maliyyə, nəqliyyat və logistika məhdudiyyətləri məsələləri çox kəskinləşib”, – M.Babiç bildirib.
O, bütün bu məsələlərin sistemli şəkildə təhlil edilərək Mixail Mişustinin rəhbərlik etdiyi hökumət komissiyasına və Rusiya Federasiyası Prezidenti yanında hərbi-texniki əməkdaşlıq komissiyasına məruzə ediləcəyini bildirib.
