Azərbaycan Avropa Hərəkatının sədri Ramin Hacılı həbs olunub. Baş Prokurorluğun yaydığı məlumata görə, Ramin Hacılı İstintaq İdarəsində araşdırılan cinayət işi üzrə təqsirləndirilən şəxs qismində cəlb edilib. Onun barəsində məhkəmənin qərarı ilə həbs-qətimkan tədbiri seçilib. Məlumatda qeyd olunur ki, Ramin Hacılı Almaniyadan deportasiya olunan Azərbaycan vətəndaşlarının ifadəsi əsasında həbs olunub.
Baş Prokurorluq iyulun 12-də Ramin Hacılının həbsi ilə bağlı daha bir rəsmi məlumat yayıb. Həmin məlumatda Ramin Hacılı ilə birlikdə saxlanılanların adları açıqlanıb: “Azərbaycan ərazisini tərk edən vətəndaşların xarici ölkələrdə qanunsuz ”siyasi sığınacaq” almalarının təşkil edilməsi faktları ilə əlaqədar Cinayət Məcəlləsinin müvafiq maddələri ilə cinayət işi başlanıb. İstintaqla müəyyən edilib ki, “No Border Travel Agency” MMC-nin rəhbəri Ramin Hacılı, “Gəncliyin Elmi-Mədəni İnkişafı” ictimai birliyinin sədri Sərdar İsgəndərov, “Yes Travel” MMC-nin vəzifəli şəxsləri Sərxan Abdullayev, Üzeyir Bağırlı, “HMH Baku Travel” MMC-nin rəhbəri Nərminə Dadaşova, Zakir Əmirov, Əziz Səfərəliyev, Akif Əsədov külli miqdarda qazanc əldə etmək məqsədilə ABŞ, Kanada və Avropa ölkələrinə səfər etmələri üçün Azərbaycan vətəndaşlarına viza alınması və səfər etdikləri ölkələrdə mühacir statusu alaraq yaşaya bilmələri üçün iş yerindən arayış, bank hesabından çıxarış, daşınar və daşınmaz əmlaka mülkiyyət hüququnu təsdiq edən sənədlər, hüquq-mühafizə orqanlarına çağırış məktubu, guya xəsarət almalarına dair tibbi arayış və digər hüquq verən rəsmi sənədləri saxtalaşdırıb satmaqla, onlara müraciət etmiş şəxslərin qanunsuz miqrasiyalarını təşkil ediblər. Qeyd edilənlərlə bağlı əvvəllər eyni xarakterli əməllərə görə dəfələrlə məhkum olunmuş Ramin Hacılı, eləcə də yuxarıda adları çəkilən digər şəxslər Cinayət Məcəlləsinin 178.3.1-ci (mütəşəkkil dəstə tərkibində dələduzluq) və digər maddələri ilə təqsirləndirilən şəxs qismində cəlb edilməklə, barələrində müvafiq olaraq həbs və başqa yerə getməmək haqqında iltizam qətimkan tədbirləri seçilib. Hazırda cinayət işi üzrə istintaq davam edir”.
Ramin Hacılının keçmiş həyat yoldaşı, yazıçı Aysel Əlizadə isə ittihamla razı deyil. O, Ramin Hacılının şərləndiyini iddia edir: “Çünki adı mühacir işində hallanıb, çünki bir dəfə tutulub, şər atmaq asan gəlir”.
Aysel Əlizadə AFN-ə bildirib ki, bu dəfə elə olmayacaq: “Bu dəfə elə olmayacaq. Keçən dəfə həqiqətən borclu olduğu adamlar vardı şikayət etmişdilər deyə, mən də, dostları da hay salmadıq, abır etdik. Mən həyasız adam deyiləm, yalandan deyə bilməzdim ki, borcu yoxdur. Amma əmin idim ki, kimsənin bir manatını aldadıb almayıb. Gizlətməyib, inkar etməyib, özü deyib ki, borca düşmüşəm. Niyə düşdüyünü də dəfələrlə açıqlayıb. Adamın başına hər iş gələ bilər. Buna görə insanı çərlədib öldürmək lazımdı? Biz imkanlı yaşamamışıq, kirayədə qalmışıq illər boyu. İndi də anamın evində yaşayıram. Kimə maraqlıdı gəlib baxsın şəraitimə. Onun bir mülkü bir əmlakı olmayıb şübhələnim ki, bunu necəsə fırıldaqla əldə edib. Həbsdən çıxdı yatmadı, dincəlmədi, işlədi, borclarının 80 faizini qaytardı. Heyrət edirdim. İnsan necə bu qədər güclü olar, işgüzar, bacarıqlı olar, sınmaz, əyilməz. Onu boş yerə müdafiə etmirəm. Ramin qızıldan qiymətli oğlandır. Mərddir”.
Xanım yazar bildirib ki, bir dəstə tutublar, pullarını alıblar, işi də Hacılının üstünə yükləyiblər: “Bu qədər bəsit! Bəlkə də sifarişdir, onu da bilmirəm. Amma təqsirsizdir! 13 maddə yükləyiblər…”
