1968-ci ildə “Mosfilm” və “Lenfilm” studiyalarının birgə istehsalı olan Valentin Yejov və Rüstəm İbrahimbəyovun ssenarisi əsasında “Səhranın bəyaz günəşi” adlı filmin sınaq çəkilişlərinə başlanılır. Uzun çəkən mübahisəli məqamlardan sonunda Rüstəm İbrahimbəyovun inadkarlığı sayəsində rejissor Vladimir Motıla dəvət edilir.
Filmin bir hissəsi Dağıstanda çəkilməli olur, burda isə hər gün yeyib içən aktyorlar nəzərdə tutulan qrafikdən kənarda qalırlar və film çəkilişi zamanı baş qəhrəman obrazı olan Suxov Fyodor İvanoviçin çətinliklə əldə edilən paltarı oğurlanır. Milisə müraciət yersiz qalır, paltar tapılmır və film çəkilişi yubanır. Rejissora məsləhət görürlər ki, yerli kriminal aləmə müraciət etsinlər ki, paltarı tapa bilsinlər.
O zaman Mahaçqalada kriminal aləmə Azərbaycanlı Əli adlı bir müddət həbsdə yatmış avtoritet başçılıq edirdi. Qeyd edim ki, kriminal aləmdə Əli kimi tanınan şəxsin əsl adı Kamil Mikayılov idi və Mahaçqalada Tolstoy küçəsində evi var idi. Vladimir Motıla onunla görüşə getmək üçün Rüstəm İbrahimbəyovdan kömək istəyir və onlar Əli adlı avtoritetlə birlikdə oturmağa nail olurlar. Əli onları dinləyir və paltarı tapacağına söz verir, amma qarşılığında rejissorun və ssenaristin nə təklif edəcəyini soruşur. Rejissor pul təklif edəndə Əli gülür və onun pula ehtiyacı olmadığını deyir. Rüstəm İbrahimbəyov isə ona filmdə kiçik bir rol təklif edəndə avtoritet dərhal razılaşır və həmin görüşdən sonra Suxovun geyindiyi paltar rejissora təqdim edilir. Rejissor də sözünü tutur və Əlini filmində quldur epizodik roluna çəkir. Şəkildə Əli oynadığı obrazdadır.
Gözlənilənlərin əksi olaraq “Səhranın bəyaz günəşi” filmi böyük əks-səda yaratdı. 1970-ci ildə filmin prokatı reytinqdə lider oldu. Bir ildə filmə 50 milyon adam baxdı. Xüsusən həbsxanalarda filmin nümayişi bir neçə dəfə edildi, çünki orda kriminal aləmin tanınan isimlərindən biri rol almış idi.
Zaur Əliyev, dosent
