Ermənistan rəhbəriyinin sərsəm və məntiqsiz açıqlamaları, sərhəddə törədilən təxribatlar, öhdəliklərin yerinə yetirilməməsi və digər bu kimi amillər Azərbaycanın Qarabağda antiterror əməliyyatlarına başlamasını zəruri edir.
Bəs görəsən Qarabağda qanunsuz silahlı dəstələrə qarşı hərbi əməliyyat keçirmək mümkündürmü?
Mövzunu şərh edən politoloq Şahin Cəfərli deyir ki, Rusiya ilə anlaşıb, Qarabağda hərbi əməliyyat keçirmək olar. Amma bu cür əməliyyatın keçirilməsi Rusiyanın razılığı olmadan mümkün deyil: “Amma Rusiya buna razı olacaqsa, hərbi əməliyyata nə ehtiyac? Rusiya istəsə, Ermənistandan gələn qüvvələri geri göndərər, yerli silahlıları da (əgər varsa) tərksilah edər və məsələ bir güllə atmadan 2-3 günə həll olunar. Əsas sual budur ki, Rusiya bunu istəyirmi? Rusiya münaqişə tərəflərindən birini ortadan qaldırıb, Qarabağ məsələsinə nöqtə qoymaqda maraqlıdırmı? Mən düşünürəm ki, ən azından hələ yox. Və məsələnin komik tərəfi odur ki, bu cür situasiya (yəni tərəflərdən birinin yox olması) 10 noyabr Bəyanatına da ziddir”.
Şahin Cəfərli əlavə edib ki, Bəyanata əsasən Qarabağda təmas xətti və qarşı duran tərəflər var: “Bunlar aradan qalxacaqsa və Azərbaycanın suverenliyi Xankəndidə təmin olunacaqsa, onda sülhməramlılar orada nə edəcək? Ümumiyyətlə, Rusiya niyə bizə 10 noyabr Bəyanatını imzalatdırırdı? Çünki özümüz onsuz da məsələni həll edirdik. Bir ehtimal qalır ki, Rusiya yerli ermənilərin təhlükəsizliyini təmin etmək üçün orada daimi hərbi baza yaratmaqla, Xankəndidə Bakının hakimiyyətinin təmin olunmasına razılıq versin – SSRİ dövründə olduğu kimi”.konkret
