“Qarabağda olan erməni silahlılarının komplekləşdirilməməsi problemi yaranıb”.
Bu sözləri hərbi ekspert Ədalət Verdiyev deyib.
Onun sözlərinə görə, 10 noyabr bəyannaməsinin şərtləri hələ də yerinə yetirilmir:
“Noyabrın 10-da Rusiya-Azərbaycan və Ermənistan arasında imzalanan üçtərəfli bəyanatın şərtlərinə görə, rus sülhməramlılarının Qarabağa daxil olması paralel olaraq erməni Silahlı Qüvvələri ərazilərdən çıxarılmalı idi.
Bəyanatda Ermənistan Silahlı Qüvvələri deyil, erməni silahlıları yazılıb. Yəni əlində silah tutan istənilən erməni nəzərdə tutulub. Bunun Qarabağdan, ya da Ermənistandan olmasından asılı olmayaraq, həmin ərazilərə rus sülhməramlılarının daxil olması ilə paralel şəkildə bu iş baş verməli idi. Üstündən 8 ay keçməsinə baxmayaraq, biz bu çıxarılmanın nə vizual görüntüsünə, nə də çıxarılmasına dair rəsmi açıqlamaya rast gəldik. Bu proseslərin təbii ki, belə fonda davam etməsi ictimaiyyətimizi də narahat edir”.
Ə.Verdiyevin sözlərinə görə, separatçı rejim Qarabağda 45-50 yaşlı mülki şəxsləri silahlandırır:
“Son aylarda müşahidə olunan proseslər onu göstərir ki, Ermənistanda hərbi xidmətə çağırılan gənclərin 8 aydır ki, Qarabağın sülhməramlıların nəzarətində olan ərazilərə göndərilməsi baş tutmur. Dolayısı ilə Qarabağda hələ də mövcud olan erməni silahlı birləşmələri gənc çağırışçılarla komplekləşdirilmir. Qarabağda xidmətini başa vuran hərbi qulluqçular isə Ermənistana yola salınır. Bu isə bir daha rusların nəzarətində olan ərazilərdə erməni hərbi birləşmələrin komplekləşməsi ilə bağlı problemlər yarandığını göstərir. Separatçı rejim rəhbərliyi isə bu problemləri aradan qaldırmaq üçün 45-50 yaşlarında olan mülki erməni əhalini silahlandırır. Qarabağ ərazisində erməni silahlılarının gənc şəxsi heyətlə komplekləşdirilməməsi artıq bir faktdır”. cebhe.info
