İyulun 15-i axşam saatlarında İranın Xuzistan əyalətinin bir neçə şəhərində yaranmış su qıtlığına qarşı kütləvi etiraz aksiyaları keçirilib.
Bu barədə sosial şəbəkələrdə məlumat yayılıb. Məlumata görə, Xuzistan əyalətinin sakinləri Mahşəhr, Kut Abdulla, Xorrəmşəhr, Mollasani, Əhvaz, Abadan, Həmidiyyə və Susəngerd şəhərlərində su qıtlığına etiraz edən əhali küçələrə axışıb.
Narazı insanlar avanın hərarətinin 50 dərəcəyə çatdığı bir vaxtda əhalini içməli su ilə təmin edə bilməyən hakimiyyətin yarıtmaz siyasətinə etiraz edib. Aksiyada hakimiyyətə qarşı şüarlar səslənib.
“Çaylar susuzdur”, “aylar öz suyunu istəyir”, “Su mənim haqqımdır”, “Din adı altında bizi talan etdilər” və “Canım da, qanım da Karun çayına fəda olsun” və digər şüarlar səsləndirən dinc narazılar rejimin Xuzistan əyalətinin su probleminə laqeyd yanaşdığını vurğulayıb, səriştəsiz idarəetməyə etiraz ediblər.
Yayılan bəzi xəbərlərdə isə etirazçılar bir neçə yerdə küçə və meydanlarda iri təkərlər yandıraraq hökumət qüvvələrinin zorakılığının qarşısını almağa çalışıblar.
Sosial şəbəkələrdə həmçinin gecə qaranlığında çəkilmiş videolarda isə hökumət qüvvələrinin dinc etirazçılara qarşı birbaşa odlu silahlardan atəş açdığı görünür. Görüntülərdə güllə səsləri eşidilir.
Keçirilən dinc etirazlarda həbs edilənlərin və ya hökumət qüvvələri tərəfindən öldürülənlərin olub-olmadığı haqqında məlumat yoxdur.
Qeyd edək ki, İran ərəblərinin yaşadığı Xuzistan əyaləti bir neçə həftə əvvəldən bu yana ciddi su problemi ilə üz-üzə qalıb.
