Artıq iki gündür İranda xüsusi xidmət orqanları və polis ciddi fəaliyyətə başlayıb. Zəfər Gününün birinci ildönümü münasibətilə Cənubi Azərbaycan şəhərlərində kütləvi şəkildə divar rəsmləri, yazıları və qrafitilər həkk edilməsi İranda güc strukturlarının hərəkətə keçməsinə səbəb olub.
Alp.az xəbər verir ki, Güney Azərbaycan Milli Hərəkatının fəalları Azərbaycanın İkinci Qarabağ Müharibəsində qələbəsinin və Zəfər Günü adlı tarixi Şuşa şəhərinin azad edilməsinin ildönümü ilə bağlı Təbriz, Ərdəbil, Zəngan və Urmu (Urmiya) şəhərlərində geniş divar rəsmləri çəkiblər.
Qeyd edək ki, Azərbaycan ötən il “Vətən Müharibəsi” adlı 44 günlük müharibə zamanı Ermənistanın 30 il ərzində işğalda saxladığı tarixi ərazilərini azad edib.
Müharibə zamanı Arazın cənubunda yaşayan azərbaycanlılar dəfələrlə Arazın şimalındakı azərbaycanlılara və türk ölkələrinin birliyinə öz dəstəklərini göstəriblər. Polis xəbərdarlıq edib ki, şüarları divarlara yazan şəxslər tezliklə tapılacaq.
