İran şahənşah ordusunun son Baş Qərargah rəisi olan general Abbas Qarabaği kim idi?
Alp.az xəbər verir ki, kökəncə Qarabağdan, olan general 1918-ci ildə Təbrizdə anadan olub. Bəzi məlumatlara görə, Tehranda hərbi məktəbdə oxuyanda şahzadə, gələcək şah Mahəmməd Rza ilə sinif yoldaşı olub. Daha sonra Fransada təhsil alıb.
Abbas Qarabaği 1974-1978-ci illər jandarm qüvvələrinin komandanı, 1978-ci ilin avqustundan 1979-cu il yanvarın 4-ə kimi daxili işlər naziri olub. Yanvarın 5-də Baş qərargah rəisi təyin edilib.
Monarxiyanın son günlərində və İslam inqilabın qalib gəlməsində Qarabağinin rolu İranda ən çox müzakirə olunan mövzulardan biridir. Onun fevralın 13-də keçirdiyi toplantıda hərbçilər ordunun bitərəfliyi haqqında qərar qəbul edirlər. Monarxistlər bunu xəyanət kimi təqdim edirlər, general özü isə bildirir ki, əhalinin böyük əksəriyyətinin inqilab tərəfdarı olması, üstəlik, artıq bəzi hərbçilərin Xomeyni tərəfinə keçməsi müqabilində onun addımı yeganə mümkün olan idi.
Ayətullah Xomeyni hələ Parisdə olarkən, yanvarın 27-də Karterə məktub yazaraq Vaşinqtonun İran hərbçilərinə təsir göstərməsini istəmiş, əvəzində İranda Amerika maraqlarını qoruyacağını vəd etmişdi. Qarabağinin və digər hərbçilərin fevralın 13-də tutduqları mövqedə bu məktubun və Vaşinqtonun təsirinin nə qədər olması ciddi araşdırılası mövzudur.
İslam inqilabının qələbəsindən az sonra Abbas Qarabağı İranı tərk edir. O, 2000-ci ildə Parisdə vəfat etdə və Per-Laşez məzarlığında dəfn olundu.
