image-ads_2000x150
image-shoyqu-putin-qrubackend

Hərbi ekspertdən SENSASİON AÇIQLAMA: “Rusiyanın hərbi kəşfiyyatı Putini aldadıb”

image-ads_728x90

Elxan Şıxəliyev: “Bundan sonrakı hədəf Ukraynada ələ keçirilmiş bölgələrdə möhkəmlənmək olacaq”

“Rusiyanın Ukraynaya müdaxilə ilə bağlı hərbi əməliyyatı barədə planlar xəritə üzərində normal hesablansa da, bəzi mühüm amillərə görə praktikada özünü doğrultmadı.” – bu sözləri Alp.Az hərbi-siyasi analitik informasiya agentliyinə hərbi ekspert  Elxan Şıxəliyev bildirib.

“Hadisələrin gedişində göründü ki, “əməliyyatar teatrı”nda bir çox problemlər var. Rusiya Silahlı Qüvvələrinin baş komandanlığı hərbi kəşfiyyat məlumatları ilə yanaşı, Ukraynada ayrı-ayrı yerlərdəki vəziyyəti, xüsusilə də Ukrayna xalqının əhval-ruhiyyəsini nəzərə almalı idi. Düşünürəm ki, Rusiya SQ-nin hərbi komandanlığına əməliyyatdan öncə ötürülən hərbi-kəşfiyyat məlumatları çox ziddiyyətli və natamam olub. Rusiya qoşunlarının üzləşdiyi uğursuzluqların əsas səbəbi də məhz hərbi-kəşfiyyat məlumatlarının dolğun və korrekt olmamasıdır. Ukraynada yaşananlar bir daha təsdiq edir ki, Rusiyanın hərbi kəşfiyyat qurumları Kremlə düzgün məlumat vermir”, – deyə hərbi ekspert qeyd edib.

Azərbaycan Ordusunun Türkiyə modelinə keçidi: “Yeni reallıq ondan ibarətdir ki…” – HƏRBİ EKSPERT

Ekspert hesab edir ki, Rusiya SQ-nin baş komandanlığı etiraf etməsə də, Ukraynada gözlədiklərinin əksi ilə üzləşdi: “Ukrayna xüsusi xidmət orqanlarının məlumatına görə, Rusiya SQ Baş Qərargahı 15 gün içində “Blitzkriq” həyata keçirməyi planlaşdırmışdı. Lakin ilk günlərdən Rusiya SQ-nin ayrı-ayrı birləşmələrin döyüş fəaliyyəti çox xaotik və rabitəsiz şəkildə özünü göstərdi. Bu da ona görə oldu ki, Rusiya qoşunları gözləniləndən çox müqavimətlə üzləşdi. Bir çox texnikanın da nasaz olması, yollarda problemlər, bataqlıqlar, müxtəlif “pusu”ların qurulması və Rusiya birləşmələrinin bir növ partizan döyüşü ilə üzləşmələri bu “Blitzkriq”in reallaşmasına imkan vermədi. Ukrayna tərəfindən paylaşılan video və foto materiallardan da görünür ki, Rusiya tərəfi ciddi itkilər verir.
İlk günlərdən Rusiya qoşunları Kiyev ətrafına çatsalar da, Ukrayna tərəfinin manevri ilə, xüsusilə də partizan tipli döyüş üsulu ilə Rusiya qoşunlarının hərəkətində xaotik və sistemsiz hallar müşahidə olundu. Rusiya ordusu Ukrayna ordusundan dəfələrlə güclü olsa da, sahədə bir çox qüsurları və zəif cəhətləri üzə çıxdı. Bura texnikanın köhnəlməsi, birləşmələr arasında logistikanın ləngiməsi, ordudakı korrupsiya amili və birləşmələrdə nizam-intizam çatışmazlığı da daxildir. Bəzi rusiyalı hərbçilərin yerlərdə qarətçilik törətməsi barədə məlumatlarla üzləşirik. Bu kimi hallar yerli rus qoşunlarının Ukraynada möhkəmlənməsinə ciddi əngəllər törədə bilər”.
E.Şıxəliyev bildirib ki, bununla belə, hər hansı tərəfin məğlubiyyəti barədə danışmaq hələ tezdir: “Əlbəttə ki, Rusiyanın resursları və canlı qüvvəsi elə də az deyil. Lakin gördüyümüz odur ki, bu qoşunlar partizan döyüşünə hazır deyillər və böyük yaşayış məntəqələrində möhkəmlənə bilmirlər. Digər tərəfdən də, Ukrayna “Bayraktar” və “Javelin” kimi müasir silahlarla yeni nəsil müharibə nümunəsi ortaya qoyur və Rusiya qoşunlarına sarsıdıcı zərbələr endirir”.

Ekspert əlavə edib ki, Rusiyanın Ukraynada möhkəmlənə bilməyəcəyini Kremldə də yaxşı anlayırlar.
“İlk günlərdə başlıca məqsəd Ukraynada siyasi sistemi dəyişmək olsa da, bunun elə də asan olmayacağı, hətta qeyri-mümkün olduğunu indi-indi anlamağa başlayırlar. Şəhərlərə raket zərbələri davam etsə də, hərbi əməliyyatlar danışıqlar fonunda səngiməyə başlayıb. Düşünürəm ki, Rusiyanın bundan sonrakı hədəfi ələ keçirdiyi bölgələrdə möhkəmlənmək olacaq”, – deyə E.Şıxəliyev vurğulayıb.

Rüfət
Alp.Az

image-ads_728x90

  • whatsapp
  • messenger
  • telegram
  • vkontakte
  • odnoklassniki