Türkiyə prezidenti Rəcəb Tayyib Ərdoğan ABŞ-ın Rusiyanın S-400 zenit-raket komplekslərinin Ukraynaya verilməsi ilə bağlı təklifinə münasibət bildirib.
Alp.Az xəbər verir ki, bu barədə “Habertürk” yazır.
Bundan əvvəl ABŞ Türkiyə ilə qeyri-rəsmi olaraq S-400-lərin Rusiyadan müdafiəsinə kömək etmək üçün Ukraynaya təhvil verilməsi imkanını müzakirə etmişdi.
Ərdoğan NATO zirvəsindən qayıdarkən verdiyi açıqlamada, “Bu gün biz əvvəldə danışdığımız, S-400-lərlə bağlı işin bağlandığı nöqtədəyik. Məsələ bizim üçün bağlanıb” deyib.
Bildiyiniz kimi, Türkiyə və Rusiya 2017-ci ildə S-400 sistemlərinin tədarükü üçün 2,5 milyard dollarlıq müqavilə imzalayıb. Vaşinqton buna cavab olaraq Türkiyəni yeni F-35 qırıcı proqramından partnyor kimi kənarlaşdırıb və daha sonra Türkiyə Müdafiə Sənayesi İdarəsi, onun rəhbəri İsmayıl Dəmir və üç yüksək rütbəli türk məmuruna sanksiya tətbiq edib.
