21 sentyabr tarixində Çeslav Mixneviçin “Legiya”ya baş məşqçi təyin olunmasının bir ili tamam olub.
Varşava təmsilçisi polşalı mütəxəssisin rəhbərliyi altında ötən mövsüm ölkə çempionluğu və Avropa Liqasının qrup mərhələsinə vəsiqə qazanıb. Klub bu nailiyyətə görə medalla yanaşı, pul da qazanıb. Belə ki, çempion və avroliqa təmsilçisi 30 milyon zlotis (6 milyon avro) əldə edib.
51 yaşlı məşqçinin verdiyi nəticə “Legiya” rəhbərliyini razı saldığı üçün, klub Mixneviçlə müqavilə müddətini uzatmaq niyyətindədir.
Bu barədə məlumatı “Legiya”nın sabiq futbolçusu, komandanın meneceri Mariuş Pekarski yayıb.
“Bir müddət əvvəl komandanın prezidenti Dariuş Mioduskiyə demişdim ki, Çeslav “Legiya” üçün ideal məşqçidir. Elə bil klub üçün xüsusi olaraq yaranıb. O, gündə 18 saat işləyir, işini sevir, futbolçuların bacarıqlarını görür.
Danışıqların necə gedəcəyini və müqavilə müddətinin uzadılmasının nə zaman baş tutacağını demək çətindir. Amma “Legiya” klubunun prioriteti məhz Çeslav Mixineviçdir”, – deyə Pekarski mətbuata açıqlamasında bildirib.
Klub rəsmisi onu da qeyd edib ki, Mixneviçin cari müqaviləsinin müddəti 2022-ci ilin yayına qədər nəzərdə yutulub. Bu səbəbdən müddətin uzadılması istənilən vaxt baş tuta bilər.
Xatırladaq ki, millimizin futbolçusu Mahir Emreli “Legiya”nın şərəfini qoruyur. 24 yaşlı hücumçu bu ilin iyun ayında Polşa klubuna keçib.Fanat.Az
